Ka Dorbar Chnong Lumputhoi dap ko dei sñiawngooh ya u Deputy Commissioner ka East Jaiñtia Hills District, u Shrivansh Awasthi wa da smat u wow chimkhia yeiwa kyrpaad ka dorbar chnong neibynta wow yaklam wa ki karkhana pynmih khyndaw-bilat khamtam ya ka Dalmia Cement Plant wow wan kit ya ki Plastic wa da pynlang ka chnong man-u-snem neibynta i khooid i jngiar ka chnong ka thaw kamjooh ya ka soodong sookun ka bei ramaw.
Chooh chooh ka Dorbar Chnong Lumputhoi dap ko leh dei sñiawngooh sñiawburom ya u MDC ka thaaiñ, u Wailad Dameshwa Siangshai uwa da chimkhia bha hajrong kani ka kaam wa da pynsñiaw kiwa ksohkaam chnong ha oo najrong wa da lai yachem u wa u DC wei da lai haroh u chadooh ka Dalmia Cement Plant wow kyrpaad ya ki neibynta wow wan kit ki ya kini ki Plastic.
Da dap leh dei sñiawngooh ya ka yung krehkaam ka Swatch Bharat Mission East Jaiñtia Hills wa da smat ki u yaraplang neibynta i lai bait lai ryntih ini i kaam. Kamjooh leh ya ka Dalmia Cement Plant wa da bien biang ko u wan kit hadien wa da kyrpaad boonsien ya ka kamwa da jooh wan kit ko chisien ha u snem 2021.
Da e leh i sñiawngooh ya ki paralok parajor kiwa kreh sokar wa ki bru paidbah kiwa da pyrchang u yaklam ya ki Cement Plant kamjooh ya ki chnat sorkar neibynta ini.
Ka Dalmia da wan kit ko ya kini ki Plastic ha ka 19 tarik uni u bnai heiwa kiwa ksoh kaam chnong kamjooh ka chnong hi waroh kawi da lai ki wow chimkhia ya ini i kaam.
Kamtæ ka chnong da e khublei ko ya waroh kiwa da pynmih pyrtuid kamjooh leh ya ki wym johkhe næ kiwa mylliñ u pynmih pyrtuid wow chimlang ki wa ini i e khublei na ka Dorbar Chnong Lumputhoi u lai ko cha phi waroh yei smat yong phi u yarap e mynsien ko ya ka dorbar chnong wow nang pteiñ ya kani ka kaam leh khooid leh jngiar.
I daw wa pynman ya ka dorbar chnong kamni toh wym kwah ko u thang ya ki Plastic, tangwa kwah ko u e cha kiwa ye u pynemkaam ya ki.
Discussion about this post