Ka Urban Affairs Department ka sorkar Meghalaya da pyntip ko wa ha ki bnai wa dadep, da thung ko ya ka Provisional Town Vending Committee (PVTC) katkam ka aiñ The Street Vendors (Protection of Livelihood and Regulation of Street Vending) Act, ka Meghalaya Street Vendors (Protection of Livelihood and Regulation of Street Vending) Rules, 2022 deilang ka Meghalaya Street Vendors (Protection of Livelihood and Regulation of Street Vending) Scheme, 2023 wei hapoh ka PVTC neibynta ka Shillong da sdang nadooh ka 13-10-22 kawa da emlang ki dkhot ka seiñ kiwa chongdai madan, ki NGO, ki dorbar chnong wa kiwi de.
Kani ka Committee toh kawa da lai chim yukheiñ ya kiwa chongdai hapoh ki thaw wa pait ka Municipal deiwa lai cha 22 tylli ki dong ki chnat wa ki yaaw ki haat wa em kini kiwa dai kiwa kynthup nadooh na Khyndailad, Iew Malong, Dhanketi, Firebrigade, Laban, Wahthapbru, Wards Lake wa kiwi kiwi heiwa da chem wa em ki 1400 ngut tangwa na kini da em 760 ngut kiwa emhok wow chongdai katkam ka aiñ wei yow yoh leh yei tipmit na ka sorkar.
Kamtæ yow pynkrehkaam ya ka Meghalaya Street Vendors (Protection of Livelihood and Regulation of Street Vending) Scheme, 2023 da chim rai wow sdang na Khyndailad yow e laad ya kiwa pyrchah kiwa ujor yow pynap pynsñiaw ki deiwa thung da ka Sub-Committee wow bichaar yeini heiwa da em 87 ngut kiwa da wan chakhmat yow dawa yei hok ki tangwa da ye wow pynsakhiat ya ki 62 ngut katwa 25 ngut won ym em wan ki.
Ya ki wym em wan da e laad biang ha ka 25-04-25 wei da ye wow pyndep yei kaam ha ka 08-05-25, kamtæ waroh kiwa da chim yukheiñ kiwa chongdai ha Khyndailad da em ki 457 ngut wei kiwa emhok wow chongdai da em ki 407 ngut.
Neibynta kiwa em ha Khyndailad da jied nyngkong wow e thaw ya ki ha ka Ground Floor ka MUDA Parking Lot (iwa da pynkylla won cha ka 1st Floor), i khmat ka MUDA Complex wa ka SMB Parking Lot wa em mar pyrchah wa ka SBI Main Branch.
Deiwa leh kamni, waroh kawi ka Khyndailad da khang wow pynman kam ka thaw chongdai namo ka No Vending Zone.
Cha waroh kiwa da emhok wei da pynsakhiat katkam ki kyndon aiñ wow chongdai ki, da e da ki Certificate of Vending (CoV) cha ki 251 ngut na ki 407 ngut kiwa em ha Khandailad.
Hadien ini da pynbna paidbah wa kitu kiwa em ya ka CoV wa hap ki wow mih noh na i thaw wa em ki yow lai cha i thaw wa da booh ya ki wei ya kitu ki wym em ya ka CoV daw hap wow beh ki.
Deiwa pyrkhat wa daw thut bha i kyrriah thaw, neiliang ka sorkar da pynbna ko leh wow e yarap Rs. 20,000 cha kitu kiwa em ya ka CoV deiwa e chwa Rs. 10,000 wei hadien won Rs. 2000 chi bnai neibynta ki san bnai.
Neiliang ka sorkar da ong ko wa da leh yeini kam chibynta ka mukotduma PIL wa da yaleh ha ka Meghalaya High Court yow pynkyllooid ya ka chnong ka thaw khlem da ktah yei khih i khan kini kiwa chongdai madan.
Discussion about this post