Ka Jaintia Artist Association namo ka seiñ kiwa em sap hei rwai i siaw, i tem i put ha Ri-loom Jaiñtia da ye u sdang ka ha ka 24 tarik uni u bnai dei yarap kyrchaan e mynsien u Deputy CM ka sorkar jylla, u Sniawbhalang Dhar.
Wei ya kani ka Association leh da wan wow wai pyrda kam ka dak i sdang i lai luti ko neini chakhmat da u Sniawbhalang Dhar hi ha ka yalang wa pynman ha Madan Ryngkaw Tpep Pale hei emlang ka Emelya Ch. Momin, Assistant Commissioner West Jaiñtia Hills District kam ka symbood kongsan, ki dkhot ka Jaintia Artist Association, kiwa chah khut sñiawbha wa kiwi.
Hawa e yei klam, u Sniawbhalang da ong u hawa sdang ya kawon kawon ka thong hap maad chwa yei eh hei lai luti najrong wow kreh chitom yow poi cha ka thong i jop.
Kyntu u ya kiwa tem wa rwai u man kiwa kreh chitom khnang yow poi cha ka thong wa mut wa mang, deiwa ong leh wa i yimphoo wa sakhiat ymtoh itu wa yoo wa yoh heipor wa thiah, tangwa i yimphoo wa sakhiat toh kawa pyndooh thiah pyndooh dem hadooh wow yoh yeiwa mut wa mang hei im.
“I tem i rwai leh toh ka kaam kawa eh bha wei ymtoh iwa suk u jop u poi thong neibhah wa heijooh i por emkaam ya kiwa tem, ki tiar pynmih sur wa boonjait, najrong wow em u næ kawa rwai neibynta u pynwandurlang chirup yei sur,” da ong u Sniawbhalang.
Ong u wa wot ka sorkar leh da pyrchang ko u e mynsien ya kiwa tem kiwa rwai ka jylla ha ki rukom waphær waphær yow man ka sap wa e myntoi ya ki, deiwa pynkynmoo haroh u yei sdang ya ka Grassroots Music Project.
Wei kamwa i khih sorkar ymtoh de kawa suk u yoh, ong u kani ka sorkar thooh laad bha ko u yarap ya ki khon khynroo khyllood yow yieñ ki hei kjat yong idæ deiwa seiñ khih lyngba ki Scheme waphær waphær, najrong wa pynkynmoo haroh u wa la kamwa 35 tylli ki Welfare Scheme kiwa da wanrah ka sorkar hapoh ki 8 snem wa da lai wa kynthup neibynta u yarap ya kiwa chong chnong ka jylla wa kynthup leh ya kiwa rep.
Ban joor u leh i yakrehlang chirup chirup hapyrdi ka sorkar, kiwa tem wa rwai waka imlang sahlang khnang yow ye pynlai bait yei kaam chakhmat, wei heiwa sdang ya ka kaam dei kreh chitom chwa da-i-hi toh kawa emkaam wei em da ka thong khnang yow ye u lai chakhmat neitæ won ki laad yarap u wan ki hadien.
Yooluti u manda man ka Association wa skem wei biang i rukom pynlai pynwan, u yohlaad bha ki u lai rwai ha ki rynsan yong ki bru samen næ yong sorkar nadooh kiwa khian næ ki heh neibhah sam chakhmat ka rynsan rwai toh kawa daw dawa bha.
Kyntu u ya ki dkhot kani ka Association u wan yachem ki wa oo lada em iwon iwon i eh næ i kwah e yumut.
Wei kamwa kwah u wow pyntipmit ya kiwa tem wa rwai ka Ri-loom Jaiñtia chakhmat ka pyrthai neibynta kani ka yalang ha kani ka sngi, ka sorkar da e yarap ko Rs. 10 lak.
Hawa ban yei emkaam i kreh chitom, da e nongmuna u ya ka Reble ka nongrwai na chnong Nangbah, West Jaiñtia Hills kawa da bna naam bha katni wei tipmit leh ya ka ha kylleiñ ka ri, wei ini waroh toh dei kreh chitom yong ka hadooh wa poi ko cha ka thong.
Ka Emelya Ch. Momin, Assistant Commissioner West Jaiñtia Hills District hawa yaroh yaka seiñ Jaintia Artist Association ong ko ka jylla Meghalaya toh kawa da kyrkhu lyngba i mahajon ya i put i tem, i rwai i siaw wei man ko leh chibynta i tipmit kyrpang ya i.
Ong ko leh kamwa la ar snem wa em ko ha West Jaiñtia Hills lyngba ki yalang waphær waphær da yoo ko chiboon ki sap rwai, sap tem hapoh kani ka District, wei em leh kiwa rwai wa tem kiwa dang emkaam i yarap e mynsien wei emkaam u pynpliah chooh chooh ki yei sap.
Wei i sdang ya kani ka Association leh ong ko man kawa em yumut bha yow ye ki u wan ha kajooh ka chatri neibynta u ya yoh yumut kylliang wei ye leh u pynmih ki sur waphær waphær.
Haka yalang wa pynlai da u Pynche Lakiang, da yoh i klam yahkhmat na u President ka JAA, u Redeamson Pakma uwa da pynche hajrong ka thong yong kani ka Association.
Da pynchongchit chooh chooh ya kani ka sngi sdang da i chimbynta kiwa rwai wa tem waphær waphær u pynyoo yei sap rwai sap tem.
Discussion about this post