Ka chaad ñiam Behdieñkhlam toh kawi na ki chaad ñiam ba bna naam ka ri-loom Jaiñtia heiwa ka yurim yong ka toh wow pyndep yei kular u Trekirot chisien chisnem deilang ka lehniam leh rukom wa ka chaad ka kmen.
Ha uni u snem hapoh ka Raij Jowai ya kani ka chaad Behdieñkhlam u sdang nadooh ka sngi Pynsin 11 tarik uni u Naiynñiaw wei u kut won ko ha ka sngi Muchai ka 14 tarik.
Kamtæ neiliang ka Dorbar Chnong Loomkyrwiang hei pait i pynlai ka Social Committee waka Behdieñkhlam Committee kam chibynta i pynkhreh yei wan yong ka Behdieñkhlam hapoh ka Raij ka chnong wei ha ka thong wow wanrah yei khooid i pliah ka chnong ka dong, ynne ka sngi Musiang da pynman ki ya ka Behdieñkhlam Cleaning Drive næ ka sngi kyrpang wow ya mih paidbah u pynkhooid pynjngiar, pynphooh pynphieñ ya ka chnong ka thaw.
Ha kani ka Cleaning Drive kiwa chong chnong da mih ya chimbynta ki dei sñiawkhia hei wow lum u pynkhooid wei wow sait u khleiñ ya ki umbaam umdih, ki luti ki syngkieñ wa haap hapoh u pood u ang ka chnong ka dong.
Neiliang ka Dorbar Chnong Loomkyrwiang dei sñaiwkhia yei khooid i pliah wei chongsuk chongchngaaiñ ka chnong ka dong, da khut wei kyrpaad joor ko ya ki lok ki jor najan najngai kiwa wan chong wan sah næ kiwa lai wa wan lyngba ka chnong ka dong wow yakrehlang ki waka dorbar chnong hei wow wanrah yei khooid i pliah ka chnong ka thaw wei wow phikir u yait nei noh taroi yei jhep i jakhlia kat chawa yoh wei wow yait nei leh kiwon kiwon ki kaam wa man pyrchah yei miat i bha ka imlang sahlang hapoh ka chnong ka thaw.
Discussion about this post