Hadien wa mih i pynbaad na uwi u khynroo wa dang 19 snem wa chah dat chah pynchitom u ha ki pulit wei da hap wow dih da ka um na paikhana heipor wa chah kset u ha ki pulit ha Sohra Police Station ka East Khasi Hills District hadooh wa da jngem i doh i pran u. Neiliang ki pulit da phah ki wow pynman da ka takit.
Ka bei uni u khynroo wa tip kam ka Mildred Jyrwa, da booh ko da ka ujor ha u Superintendent of Police, u Vivek Syiem wa ka Meghalaya Human Rights Commission wa khlieh da u Chairperson, u Justice (Retd) T. Vaiphei yow dawa yei hok.
Ha kani ka ujor da ong wa ha ka 3 tarik uni u bnai, ki pulit da wan thooh ki ya u khon ko uwa da embynta ha kawi ka yachoh yadat wa uwi won u khynroo ha ki sngi wa dadep tangwa u khon ko ym em u.
Hadien ini da lai booh ko ya u khon ko cha Sohra Police Station heipor kamwa 9:00 waje i step wei manda li thooh ko oo heipor 2:00 waje i sngi, u khon ko da em u sa du i kha wa chah dat chah sympat ha i bynta i lymong wa ki kjat wei da hap ko wow lai yah oo cha Sohra Community Health Centre heiwa da phah wow kit won oo cha Shillong Civil Hospital yow yoh yei sumaar wa biang.
Da ong ko wa lada u khon ko da leh u ya i kaam pyrchah aiñ, hap wow bood ya ka kyndon aiñ ymtoh wow pynchitom oo dep tæ pynlait oo. Wei deiwa leh ki pulit kamni da ktah ko ya oo ym du yei doh i pran tangwa wot yei pyrkhat pyrdaiñ u.
U khon ko da ong u wa mar ya chimkti ki pulit oo, da kset ya oo wei manda paan um u, da kyntait ki pulit wow e wei da phah ya oo wow dih da ka um napoh paikhana.
Heiyatoh wa ini, neiliang ki pulit ka East Khasi Hills Police da thung ki da ka takit yeini wa da ujor kani ka manbei wei da kular ki wow leh yeiwa emkaam katkam wa chem ka takit wei da phah wow pyndep yeini hapoh kani ka tayaaw.
Ya ka takit da thung da u Sub-Divisional Police Officer (SDPO) ka Pynursla, u Baialamphang Wanswett wow leh yeini.
Ki pulit da pyntip ki ha ka 1 tarik uni u bnai, da yoh ujor ki na u waheh chnong ka Mawkisyiar, Sohra wa uni u khynroo da dat u ya uwi na kiwa chong chnong wei da maham u leh ya uni u bru deilang ka kur ka jait u.
Chooh chooh da pyntip wa ka dorbar chnong da phah wan ki ya uni u khynroo ha ka 28 tarik u bnai wa dep wa ha ka 1 tarik uni u bnai tangwa uni u khynroo ym em wan u, kamtæ da booh ki da ka FIR ha ka 1 tarik hi.
Da khana leh wa ki pulit heipor wa mut ki wow lai kem ya uni u khynroo, da yut u chwa wow poi ki pulit ha yung wa sah u, kamtæ ha ka 3 tarik da wan yah ka bei u oo cha Police Station wei da chimkti ki pulit oo, wei ha ka jooh ka sngi da wan li thooh biang ka oo.
Discussion about this post