Hadien kamwa chi bnai wa sdang i kynaad hapyrdi ki Karbi wa ki Pnar, ynne ka sngi u Dy. CM ka jylla uwa man leh u MLA ka thaaiñ, u Sniawbhalang Dhar da hiar u cha chnong Lapangap, West Jaiñtia Hills.
Ha ini i hiar da emlang u CEM ka JHADC, u Thombor Shiwat, u Dy. CEM, u Lasky Rymbai, ki MDC ka Council, u Waheh Chnong ka Lapangap, u Deibormi Lyngdoh, u Waheh Chnong ka Khanduli u Yooshida Nongspung wa kiwi.
Da emlang leh u DC ka West Jaiñtia Hills, u Abhinav Kumar Singh; u SP, u JS Dhonoa wa kiwi ki sahep sorkar.
Neiliang u Sñiawbhalang da lai pait u ya i pynthor wa rep ki Pnar na Lapangap iwa em hajan ka ktem wa chong chipor ki pulit ka Assam heiwa da yaklam u leh wa ki waheh chnong, ki warep wa kiwi.
Hadien ini da em ka yalang ha madan ka Lapangap heiwa da pynsñiaw u ha ki paidbah wa i thmu ka sorkar toh wow yada ya ki paidbah ka chnong Lapangap wa dang haap hapoh ka Nartiang Constituency. Da kyntu u leh ya kiwa chong chnong wow pynbiang ki kot sla ki yow suk u ya pynbait thaw manda yaklam hapoh ka Regional Committee kawa da thung yow pynbait pood.
Da ong u leh wa emkaam wow em i suk i saaiñ yow lait nei dooh mynsien bru, kamtæ da ong u wa lada emkaam wow pynjem chisien leh hoi hi neibhah kiwa em na kawi ka liang leh ki hap ki wow pynjem deiwa e nongmuna u wa hadien wa yaklam Phone wa na kiwa na Assam da sdang ki wow kyrriah.
Da pyntip u leh wa daw yaklam myntu i miet wa u Chief Minister ka jylla, u Conrad Sangma hajrong kammon wow yada wei wow wanrah biang ya i chongsuk ya ki warep wa ki paidbah ka thaaiñ khappood.
Discussion about this post