Ka Montri ka sorkar pyrdi kawa pait ya ka muna tangka, ka Nirmala Sitharaman da ong ko wa hadooh 92 tylli ki chnong khappood ka jylla Meghalaya daw kylla man noh ki kam ki chnong wa nyngkong ha India.
Katkam wa ong ka Montri, kini ki 92 tylli ki chnong da chah jied ki kam chibynta yong ka wat wa ar yong ka Vibrant Village Programme ka sorkar pyrdi, wei man ki kam ki chnong kiwa em ha khappood wa ka ri Bangladesh.
Ka Nirmala da ong ko wa daw lai ko wow yooh kjat ha kattu katni na kini ki chnong khappood hei lai pait yong ka mynstep ka sngi wei da angnood bha ko wow yoh u yaklam wa kiwa chong chnong wa em ha khappood.
Ka Montri da pynsñiaw ko leh wa ka sorkar u pyrchang ko wow warah ki kaam pynroi cha ki chnong kiwa em ha ki thaw khappood wa kiwi won ki ri kam ka Myanmar, Tibet, China wa Nepal.
Hawa kylli hajrong i pynsangeh ka sorkar ya ka Border Area Development (BAD) Programme, ka Montri da ong ko wa ka song pisa cha ki thaw khappood dang pteiñ i wei da pynlai da ka chnat Home Ministry wa ka Defence Ministry ka ri.
Ka Nirmala da ong ko wa ka Vibrant Village Programme da man ko kattæ ka luti wa rap bniah wow wanrah ya ka roi ka paar wa pura cha kitu ki chnong kiwa em ha khappood.
Da ong ko wa kani ka thong toh wow wai ki laad kamai jakpoh, u pynkhlan ya ki laad pynyatoh, ka puræ puthi, ka chait ka khiah wa iwa emkaam man-ka-sngi yong kiwa chong chnong wa sah ha ki chnong khappood.
Discussion about this post