Ha iwi i jia wa sñiawsih ya kawi ka manyung ha Mawriang-Tyrnai kawa dang haap ha Mairang Block, kawi ka khynnah wa dang 15 snem i rta da dooh no ko yei mynsien hadien wa baam ya u sapdok wa da man bih.
Kani ka khynnah kawa dang puræ Class-XI toh kawa tip pyrtuid kam ka Shailynti Marngar.
Katkam ka khubor wa da yoh lum da ong wa neidaw wa da man bih uni u sapdok wa baam ja ha yung, ka bei, u pa wa ki payu ko leh da kjut ki syndet-syndet hadien wa waroh chi yung da baam ki ya u sapdok ha ka 13 tarik uni u bnai.
Hadien wa waroh chi yung da yoh kjut ki, da kit wut-wut cha Nongum PHC, cha Kynrut PHC wa cha Mairang CHC, katwa ka Shailynti da chong ko ha yung wa u payu neidaw wa ha itai i por ym em da chitom palat ki, tangwa heipor miet da yoh kjut syndet ki wei da pynkit cha Nongum PHC, tangwa da khlaad noh ka Shailynti chwa wow poi cha ka thaw sumaar.
Ya ka Shailynti da dep wow tlep emburom ryngkat i pyndep ya ka niam ka rukom ha ka 16 tarik hapyrdi i sñiawsih kthang wa i piah dohnood deiwa emlang kiwa wan sñiawlem nadooh ki tymmen wasan wa ki pastor ka Nongum Presbytery, u MDC ka Parïong-Mawthadraishan, u Powel Sohkhlet, ki khynnah skur, kiwa sikai wa kiwa ha-yung ha-sem.
Discussion about this post