Ka Meghalaya High Court da rai ko wow sangeh ya ka mukotduma PIL wa da leh da ka hi pyrchah ya ki Lawyer kiwa pynman yakhih deiwa dam lai kreh wa khut pynman da ka Shillong Bar Association wa ka Meghalaya High Court Bar Association hadien wa paan maap ki deiwa kular wym chimbynta de ki ha kam kini ki kaam neini chakhmat.
Hawa chong bichaar yeini da ka miej bichaar (Division Bench) wa kynthup ya ka Chief Justice, ka Revati Mohite Dere wa u Justice HS Thangkiew ya kani ka PIL heiyatoh wa ki Lawyer na kylleiñ ka Meghalaya kiwa yakhih deiwa dam kreh yow dawa pynhiar chuki noh ka sorkar ya u Advocate General. Da pynman ko ya ka High Court wow pynmih ki Notice hapoh ka Section 15 ka Contempt of Courts Act, 1971 deilang ka Article 215 ka Constitution ka ri ha ka 8 tarik uni u bnai.
Heipor wa phah wan mih ya ki Lawyer da wan waroh lait noh ki ar ngut kitæ ka Nurina N. Lyngdoh wa u Stevie R. Lyngdoh kiwa da booh yei paan maap hakhmat ka yung bichaar heiwa kini ki ar ngut da paan por ki wow booh ya ki Affidavit.
Heiyatoh wa kini ki ar ngut, da pyntip cha ka yung bichaar wa ka Nurina da ieh ko yei kaam kam ka Assistant Secretary wa u Stevie won kam u Executive Member ka Shillong Bar Association chwa wow chim ya ka rai wow dam lai kreh, kamtæ da pyndam ya ka ‘Contempt Proceeding’ pyrchah ya kini.
Da pyndam leh ya ka ‘Contempt Proceeding’ pyrchah ya u K.S. Kynjing wa u N. Syngkon kiwa da e jubab lyngba ki Affidavit wym em chibynta ki ha ka yakhih heiwa da pynoo ki leh ki sabut wa wan kreh hi ki.
Kiwi won ki Lawyer da e ki da ki Affidavit yow paan maap yeiwa dam ki u lai kreh deiwa sihlet leh wa chimbynta ki hei yakhih wei ym leh de ki kamni neini chaphrang wei u burom ki leh ya ka yung bichaar kamjooh ya ka aiñ.
Ka yung bichaar da pait leh ko leh yeiwa kini ki ar tylli ki seiñ ki Lawyer da pyndam ki leh yei yakhih hadien wa yoh ya ki Show Cause Notice wei deiwa hun leh yei paan maap ki, kamtæ da pynkut noh ko ya ka mukotduma khlem da pynchitom ya ki.
Discussion about this post