Ka AICC ynne da ong ko wa i mih noh u MLA ka Congress, u Ronnie V Lyngdoh ymtoh iwa phylla neibhah i lai thied MLA ka NPP da ka poisa wa pynmih ki nei kaam baam tooh wei i lute ya ki bru ka Meghalaya dang pteiñ hi i.
U AICC Joint Secretary, uwa man leh kam uwa pait ya ka Meghalaya, u Mathew Antony da ong u wa ka Party ym em yoh ko kawon kawon ka chithi wa da mih noh u Ronnie napoh ka Party.
“I waroh tip i iyi jia ya u Judas uwa chetkylla heiwa kini ki MLA toh kiwa da jop ha ka chap ka kti tangwa da chetkylla ki mar ya em wa tyrwa poisa”, da ong u.
U Mathew da ong u wa ka Congress toh kawa da yarap ya kini ki MLA wei kattu daw khlan chooh chooh ko deiwa thung ya kiwa yahkhmat wa thymme ha kini ki sngi wow wan.
Da ong u leh ka thong toh wow pyndam ya kani ka sorkar wa baam tooh wei wow yarap ya ki bru ka Meghalaya yow lait ki na ini heiwa da chah tooh chah lute ki hadooh wa kiwa dooh wa duk sam dooh ki kat dang mih ki sngi.
Chooh chooh da ong u wa hawa ki Montri, ki MLA da thied ki ya ki kari thymme, ki yung ki sem wei lai uiñke suwari ki deiwa leh pahooh, kamtæ kiwa chong chnong ka Meghalaya toh u kylli ki neiwon yoh ki ya kani ka poisa wei lada ym yoh jubab yeini pynyoo wa da tooh ki da ka poisa ki paidbah yow thied yung thymme, u chna yung thymme wei wow phah lai puræ ya ki khon ki cha baar ri.
Heiyatoh wa u Ronnie da ong u wa kam u MLA da sñiawthooh u yei tlot i krehkaam u wei da sñiawthooh u wym jop hi u leh ha ka Election wow wan wei ye u leh wow dooh Ticket na ka Party wei na ini i daw da ye wow thied ya oo.
Discussion about this post