Ka Confederation of Meghalaya Social Organisation (CoMSO) Jaiñtia Region ynnin ka sngi lyngba ka dorkhat wa da lai e kti ha u Deputy Commissioner ka East Jaiñtia Hills District, u Shivansh Avasthi wa da soi da u Sambormi Lyngdoh, Vice Chairman wa u Roitre Dkhar, Secretary COMSO Jaiñtia Region, da dawa ko ya ka Office u DC wow lai kynreh ya ki bru wa wan na baar neibhah wa em boon kiwa wan chong chnong hapoh ka thaaiñ East Jaiñtia Hills.
Yeini i lai kynreh u ya krehlang leh wa ka COMSO Jaiñtia Region khnang yow khanglaad ya ki bru kiwa na baar wa sah pyrchah aiñ ki hapoh ka thaaiñ khamtam kiwa na Bangladesh.
Hajrong ini i dawa ka seiñ, da pynrap ko deiwa ong wa neiliang ka jylla Assam da pynman ko ya ka Eviction Drive wow beh phah liwan lut ya ki bru wym toh nong India, kamtæ kitu ki bru wa yut na jylla Assam ye ki u wan psiah chapoh ka thaaiñ East Jaintia yow thooh thaw sah.
Ka seiñ da pynkynmoo haroh ko wa dang ha kini ki sngi wa dep ka Union Ministry of Home Affairs leh dadep phah ko ya waroh ki jylla wow thung da ki Special Task Force (STF) neibynta wow paitsiar ya ki bru wa na baar ka India kiwa thmu psiah pyrchah aiñ chapoh India, tangwa hei yaklam ka seiñ wa u DC ka East Jaiñtia Hills pyntip u cha ki wa neiliang ka jylla Meghalaya ympu em chna næ thung ko ya katæ ka STF hapoh ka District hadooh ynne ka sngi.
Hanla kattæ leh, neiliang u DC da ong u wa smat u wow ya krehlang neibynta i bha ka District khamtam wow khanglaad ya ki baar ri wow psiah pyrchah aiñ chapoh ka District.
Chooh chooh ong u wa daw khut yachem u ya ki waheh chnong wa em hapoh East Jaiñtia wa kamjooh ya ki sahep sorkar yow thooh ki laad kammon u khanglaad ya ki bru wa na baar u psiah pyrchah aiñ ki chapoh ka District wei wow thooh laad leh u pynman i lai kynreh ha ki kattu katni ki chnong wa ye ki baar ri u chong rieh.
Discussion about this post