U Montri Rangbah ka Meghalaya, u Conrad Sangma da thoh u cha u Montri Rangbah ka Chhattisgarh, u Vishnu Deo Sai heiyatoh wa i chah kem ki ar ngut ki Nun kiwa na Kerala wa tip kam ka Sister Vandana Francis wa ka Sister Preethy Mark kiwa kreh ha Fatima Hospital wa em ha Agra.
U Conrad da ong u wa ha ka 26 tarik u bnai wa dep, kini ki Nun da chah ksoh ki ha ki pulit ka Chhattisgarh ha Durg Railway Station deiwa chah pynbaad ha kawi ka seiñ.
Ini da jia i heipor wa kini ki Nun dang lai yah ki ya 3 ngut ki khynthai kiwa na Chhattisgarh cha Agra heiwa u Travelling Ticket Examiner (TTE) da kylli takit u ya kini ki kynthai kiwa da ong wym em Ticket ki wei da lai ki neidaw wa khut kini ki Sister.
Uni u TTE da pyntip u yeini cha kawi ka seiñ wa tip kam ka Bajrang Dal kiwa da wan pynbaad wa kini ki Nun da pyrhchang ki wow rah ya kini ki kynthai yow pynkylla niam yabor ki wei hadien ini da hap wan ki pulit wow rah ya kini ki kynthai deilang ki Nun deiwa booh ujor kani ka seiñ pyrchah ya ki.
“Ya kini ki Nun da chah pynngat hapoh ki kyndon wa khor bha wei ini man ko du kam wow pyndik wei chah pynbaad bakla donhi,” da ong u Conrad deiwa kyntu leh ya u Montri Rangah wow tuklar u yeini wow em ka takit kawa khooid wa khlem leh chiliang, u yada yei hok ki niam wa khian paaid wei wow pyndam noh ya ka Case pyrchah ya kini ki Nun.
Neiliang ka Catholic Bishop’s Conference of India (CBCI) da thoh ko leh cha u Prime Minister wa u Home Minister ka ri hajrong ini i jooh.
Kini ki Nun da chah pynngat ki ha ka Section 4 ka aiñ Chhattisgarh Freedom of Religion Act, 1968 (Conversion) wa Section 143 ka BNS (Trafficking) kiwa man ki kyndon wow khang yei pynkylla niam wei i khayi tooh ya ki bru.
Discussion about this post