Rs. 20,000 e yarap ka Synjuk Ki Waheh Chnong Jowai wow lai yasaaid neibynta ka wah Myntdu

Ha ka yalang tbian ynne ka sngi ha yung krehkaam ka Dorbar Chnong Chiliangraij, Jowai neiliang ka Synjuk Ki Waheh Chnong Jowai da e yarap ko cha ka seiñ Khooid Ya Ka Wah Myntdu ka wow lai yakhun ya ka mukotduma ha NGT.

Ya ka yalang da pynlai da u Vice President ka Synjuk, u Riquoma Rq. Laloo uwa da pdiang burom ya waroh ki dkhot ka synjuk kamjooh ya ki dkhot ka Khooid Ya Ka Wah Myntdu, heijooh i por da e u ki kyntien waiphang.

Hei klam, u Riquoma da ong u wa ka synjuk hi da chimkhia ko ya kiwon kiwon ki kaam wa yatoh hapoh ka sor Jowai, kamwa dadep kreh ko yei bhah i jhep iwa man ka phang wa heh bha heitu i por wei heini leh neibynta i yap i im ka wah Myntdu kawa psa um-baam um-dih ya waroh kiwa chong wa sah hapoh Jowai, da chong ko ya ka yalang wei da rai woo lai pynchiap Rs. 20,000 kam i dak wow pyn-eh-daw pyn-eh-nasib yei yaleh yoh u poi chei jop.

Da ong u wa lym em i ya kyrchaanlang heini i por, ka wah Myntdu kawa da kheiñ Syiem na ki wah, chisien ka sngi daw dooh ka.

Chooh chooh da ong u wa ka synjuk wym em u pyrchah ko ya kiwon kiwon ki kaam pynroi wow wan ki ha Jowai, tang wym hoi won u pynjæd yeiwa da em, khamtam ka wah Myntdu yohsa u nang pynmiat pynbha chooh chooh i ya ka yoh ko u e la-ær, e um chooh chooh ya ki chnong ki thaw kamjooh ki doh um næ mrad khloo.

Da yoh leh yei klam na u G.H. Bareh, u dkhot ka Khooid Ya ka Wah Myntdu, uwa da kyntu wei khut yei yakrehlang yong waroh yoh u ye u pyndep ya kiwon kiwon ki kaam wa da mang ka seiñ, khamtam heini ipor wa da booh tarik ka NGT ha ka 22 tarik yoh ki u lai mihkhmat cha ka yung bichaar.

Da ong u leh wa ymtoh wa pyrchah ki yei kreh u Contractor næ ki chnat waphær waphær hei wow pynmiat pynbha ya ka sor Jowai deiwa pynrap wa waroh ini wa leh ki toh yei bha i miat donhi ka wah Myntdu.

Ha kani ka janmiet da yoh leh yei klam na u Khroo Lamsalanki Pariat uwa man u President ka Khooid Ya Ka Wah Myntdu, heiwa da batai bniah u heiyatoh wa i lai luti ka seiñ nadooh wa sdang hadooh wa poi ha kini ki sngi.

Related posts

Yap u sahep IPS ka Haryana deiwa suba wa siat u ya idæ

October 7, 2025

Yoh u Hek, u Kyrmen, u Comingone wa u Shakliar da ki chuki Chairman wa Adviser ka sorkar

October 7, 2025

Da e ngooh u ya ki lok ki jor najan najngai kiwa da kyrchaan met wa mynsien ya ki yoh ki u ye u pyndep ya ki kaam chakhmat deiwa khana leh wa ya ki RTI wa dadep leh ki kiwa yatoh wa ka wah Myntdu.

Da yoh ya ki kyntien e khublei na u R.L. Bimee Suwer uwa man u General Secretary ka Synjuk Ki Waheh Chnong Jowai, uwa da pynbood won ya ki kyntien kyrkhu kyrdoh ya ka seiñ khnang wow yoh ko u wanrah yei jop pyn na Delhi.