Ka Cabinet ka jylla Assam ynnin ka sngi da rai ko wow sangeh noh u e Aadhaar Card cha kiwa da palat 18 snem lait noh ki Scheduled Caste, Scheduled Tribe wa ki jaitbru wa rep slacha ya kiwa da e por chi snem chwa wow sangeh neibynta yong ki leh.
Ya ini da pynbna da u Chief Minister ka Assam, u Himanta Biswa Sarma hadien ka Cabinet Meeting wei yeini da leh khnang wow yada nei yoh kot ki baar ri wei kamwa man kattæ ha Assam waroh ki bru da em Aadhaar ki wei kamwa 96% kiwa man kam ki SC, ST wa ki jaitbru wa rep slacha.
Da ong u wa da chim yeini i rai neibhah ha u 2024 da yoh u kem ya chiboon ngut ki Bangladeshi wa psiah tooh chapoh ka ri na khappood heiwa du ha ka 20 tarik uni u bnai da pynuiñ ya ki 7 ngut tangwa ymtip lada da ye u kem lut ya waroh ki. Kamtæ da kwah wa kitu kiwa psiah pyrchah ya ka aiñ cha Assam ym ye ki wow yaleh Aadhaar yow im kam ki bru ka India wei da emkaam wow khang noh ya kani ka dwar.
U Himanta da man u u Chief Minister wa nyngkong wow leh yeini wei em bor hi u yow khang yei e Aadhaar Card cha kiwa da heh (palat 18 snem).
I pyndap Aadhaar ya kiwa da palat 18 snem da duna bha i ha ki snem wa da lai hadien wa ki jylla da dap lut ki kiwa da leh.
Ya kiwa dang khynnah namo kiwa hapoh 18 snem i rta ym emkaam u yohbor na ka sorkar neibhah wa emkaam u yohbor donhi na ki bei wa ki pa hawa yaleh Aadhaar.
U Himanta da ong u leh wa ini u sdang krehkaam i nadooh ka tayaaw wa nyngkong u Naichiphaw wei ki bru wa man SC, ST wa ki jaitbru rep slacha u yoh ki sa chi snem wow leh ya ki Aadhaar yong ki.
Katkam wa man katni ya ki Aadhaar ye u pyndap ha ki Centre wa kyrpang heiwa ya ki Verification da leh da ki ADC næ Circle Officer wow pyntikna lada kiwa pyndap pyrtuid toh kiwa na ka District.
Discussion about this post