Ka Department of School Education and Literacy da jied ko ya u Dr. Heipor Uni Bang uwa man leh kam uwa seiñ ya ka K.B. Memorial Secondary School, Wapung, East Jaintia Hills wow yoh u ya ka National Teachers’ Awards 2025.
Yei pyrtuid ki 45 ngut kiwa sikai da pynbna da ka President Droupadi Murmu wei daw pynkupburom ki ha ka 5 tarik u September kam chibynta ka Teachers’ Day. Na kini da em leh mar le ngut kiwa sikai na Maharashtra wa Bihar. Mar ar ngut na Madhya Pradesh, Chhattisgarh, Gujarat, Uttar Pradesh, West Bengal wa san ngut kiwa sikai ha ki skur Prime Minister Schools for Rising India (PM SHRI) kiwa da mih pyrtuid ha uni u snem.
U Dr. Heipor Uni Bang toh uwa da yoh PhD ha ka Environment Management ha u snem 2024, da yoh u leh ya ka State Award na ka Education Department ka sorkar Meghalaya ha ka 5 tarik u Naikhynde 2024, ya ka District Award ha u snem 2021 wei da yoh u leh ya ka Lifetime Membership ka Red Cross na u Governor ka Meghalaya ha u snem 2018.
Da sdang u wow sikai ha u snem 2009 hadien wa pyndep ya ka MSc ha ka Botany, wei da kreh u leh ha kiwi ki skur chwa wow sdang u ya ka KB Memorial Secondary School ha u snem 2013 wei da phah kani ka skur ya kiwa yaleh SSLC wa nyngkong ha u snem 2015.
Kani ka skur da chim ko leh yei bai skur wa duna wei da e ko dei mynkna ka bai skur cha kitu kiwa duna hei doh i pran kiwa da boon wa da pyndep ya ka SSLC heiwa u 2024 da em uwi na ki wa yoh 1st Division deiwa yoh Distinction.
Puræ leh: Yoh kyrdan Ph.D u Heipor Uni Bang
Discussion about this post