Ka National People’s Party (NPP) lyngba ka National Committee (NC) wa ha ka Annual General Meeting (AGM) wa da pynman ha Tura ha ka 2 tarik uni u bnai da chim ko ya ka rai wow dawa pyndam pyndooh (Repeal) ya ka aiñ Arunachal Pradesh Freedom of Religion Act (FRA), 1978.
Neiliang u National Working President, u James K. Sangma da ong u wa hap wow pyndam ya kani ka aiñ neidaw wa man ko kawa khor bha wei katkam ka Article 25 ka Indian Constitution da em ka hok wow jied tangwa kani ka aiñ won da ktah ko yei hok ki bru samen wei kam ka NPP u yada ko yeini i hok.
U K.T. Thomas, President Kerala Unit ka NPP da ong u wa kani ka aiñ toh kawa man pyrchah yei mynsien ka ri kawa da sakhi yei kha ki soo tylli ki niam kitæ ka Hindu, Jaini, Sikh wa Buddhist wei i kylla niam da jia i nadooh ki por yong rim heiwa ya ka niam Christan da wanrah da u St. Thomas ha u snem 52 AD wei hadien da wan ka Islam wa kiwi de.
Neiliang u National President, u Conrad K. Sangma da ong u wa ym em thaw ya kam kani ka aiñ neibhah ye wow pynemkaam bakla ka yow lehbeiñ ya kiwi wei kam ka NPP ym pdiang ko ya ka aiñ kawa daw yooh beiñ wei ksih ya kiwa khian paaid.
Kaw wow pynkynmoo wa kani ka aiñ toh kawa da khang yei kylla na kawi ka niam cha ka kawi deiwa pynbor, deiwa chim kabu, deiwa pynbiej wa kiwi de wei i thmu toh wow yada ya kiwa dang man kam ki niamtre tangwa ym em da pynkrehkaam ka nadooh u snem 1978, tangwa katni da pynkhai im ka heiwa da mih i pyrchah na kiwa da man Christan neidaw wa khuslai ki ya chah lehbeiñ ki.
Puræ leh: Dawa ki Christan ka Arunachal Pradesh wow pyndam noh ya ka aiñ APFRA
Discussion about this post