Boon da kiwa chongdai ya ki dukan wa em ha Iawmusiang | Daw thooh laad pynyoh thaw ya waroh: Wailadmiki

Ynne ka sngi u Montri ka sorkar jylla uwa man leh u MLA ka Jowai, u Wailadmiki Shylla da lai pait lai sylli u ya ka Iawmusiang Shopping Complex hei emlang u EM wa pait ya ka chnat Market ka JHADC, u Seiborlang Shadap chirup kiwa kitkaam ka Jaiñtia Tribal Traders Association (JTTA) wa kiwa chong dukan ha yaaw wa ki sahep na ka PWD.

Ha kani ka sngi da em leh ka yalang wa tbian heiwa u Wailadmiki da ong u wa i pyndep ya ka Iawmusiang man i ka thong wa hakhmat yong oo nadooh u 2018 wa yakhun u ya ka Election MLA neibhah wa man i thrang ki paidbah wa da sahteiñ da boon snem.

Da ong u wa i pynwandur namo ka Plan da leh nadooh ki snem 2007-2008 ha i dor iwa phær bak-la-bak neiwa katni wei ha u 2024 da yoh poisa na ka sorkar jylla Rs. 25 klur tam neibynta wow sdang chna biang ya ka.

Chooh chooh da ong u wa katkam wa man katni i kreh man i 70% iwa dadep deiwa e khublei ya u Contractor, u Pyrkhat Hinge uwa da kreh smat wow pyndep ya kani ka Complex katkam wa da booh wow pyndep hapoh 24 bnai.

Neiliang u Asst. Executive Engineer ka PWD (Building), u Wanker Slong da pyntip u wa ha kani ka Complex daw em 320 tylli ki dukan.

Neiliang u Seiborlang da e khublei u ya u Wailadmiki Shylla wa da kreh sakhiat u wow ye u yoh poisa wow chna ya kani ka Complex heiwa da khana u wa katni em palat 700 tylli ki Permit wa da e ka JHADC.

U President ka JTTA, u I. Najiar da ban joor u wa chwa wow kyrriah ya ki cha Iawthymme da em palat 600 tylli ki dukan tangwa katni u chna won du 320 tylli man iwa eh bha neibhah daw mih i awri i yaknieh ya ki dukan manda wai ya ka.

Da kyrpaad u wow thooh laad kammon wow ye u pdiang ya waroh kiwa chongdai khnang wa u neh i burom ya u MLA kamjooh ya ka District Council.

Related posts

Phla u khynnah wa 13 snem wa yap ka Insaphira nei ngam um

September 17, 2025

Pynkynmoo ka JHADC we emkaam u paan bor chwa u pynman Fishing Competition

September 17, 2025

Hajrong ini neiliang u Wailadmiki da ong u wa i kreh ya ki dukan man i katkam ka Plan wa da pynkhreh nachwa wei emkaam u pynbait ya ini hapyrdi ka JTTA wa ka District Council deiwa yooluti u wa daw em ka laad hadien.

Da pynrap u leh wa ka District Council ye ko u thooh laad na ka 16th Finance boi yoh yarap wow pynheh ya kani ka yaaw.