I leh Survey ya u sarok 4-Lane wa thymme wa tip leh kam u High Speed Corridor wa jrong 166.80 Km nadooh na Mawlyngkhung wa em hajan Umiam, Meghalaya chadooh cha Panchgram wa em hajan Silchar, Assam da antaad wa daw ye u pyndep noh hadooh wa kut uni u snem.
Neiliang ka sorkar Meghalaya da ong ko wa yeini i leh Survey da ye wow leh deiwa ya krehlang ka NHIDCL wa ki DC wei kani ka kreh man ko kawi na kiwa heh dooh hapoh ka ri yow pynsuk yei lai i wan hapyrdi ka Meghalaya wa kiwi ki jylla ka North East.
Neiliang u Deputy Chief Minister uwa pait leh ya ka chnat PWD (Roads), u Prestone Tynsong da ong u wa i leh Survey toh iwa da jan dep ha ka Ri-Bhoi, East Khasi Hills wot ha West Jaiñtia Hills.
Tangwa iwa rap eh toh ha East Jaintia Hills neidaw i long i man ki loom ki wah khamtam heipor slap heiwa da em ki por wa ki Engineer da hap ki wow lai 2-3 kynta yow poi cha ki thaw wow leh Survey.
“Hanla kattæ leh sñiaw skem i wow pyndep leh ya ka Survey neibynta ka East Jaintia Hills chwa wow kut uni u snem,” da ong u Prestone.
I kreh ya uni u sarok toh iwa da booh hei dor wa Rs.22,864 klur uwa jrong 166.80 Km heiwa 144.80 Km toh iwa em hapoh Meghalaya katwa ha Assam won 22.00 Km.
I thong toh wow pynyabi leh wa kiwi ki sarokbah kam u NH-27, NH-106, NH-206 wa NH-37 yow smat ka lai ka wan cha Guwahati, Shillong, Silchar, Diengpasoh, Ummulong, Phramer, Khliehriat, Ratacherra, Umkiang wa Kalain.
Ha kawi won ka liang, u Deputy Chief Minister da pyntip u wa ka Package 1, 2, 4 wa 5 u sarok Shillong-Dawki toh iwa da lai bha chakhmat hanla da wanrah i yei thut ya ki paidbah wa lai wa wan khamtam ha ki bynta wa man 4-Lane, wei ka sorkar da phah ko ya ka NHIDCL toh u pyntikna ko wa ka Package 1 toh u pyndep ka chwa u kut uni u snem.
Da ong u leh wa i kreh won ya ka Package 2, 4 wa 5 toh iwa hun wei da yooluti wow pyndep yei kreh chwa u kut u snem 2026.
Discussion about this post