Ki Fighter Jet MiG-21 kiwa man u budloom ka Indian Air Force (IAF) da palat 60 snem, da pynchong-ngiah noh ya ki ynne ka sngi ha Chandigarh Air Force Station.
U Defence Minister ka ri, u Rajnath Singh da man u kam u kongsan ha ka yalang ynne chwa wow chong-ngiah noh kani ka lieñsuiñ na Soviet Union (katni ka Russia) iwa pynyoo yei yatohlok wa khlan hapyrdi ka India wa Russia.
U Rajnath da kynmoo u yei chakri kini ki lieñsuiñ ha ka thma 1971 pyrchah ya ka Pakistan, khamtam heipor wa dat Bomb ya i yung u Lat ha nongbah Dhaka.
Ya ki MiG-21 da chimkti ka India ha u 1963 hapoh i yahkhmat u Dilbagh Singh wei da man ko ka Supersonic Fighter Jet wa nyngkong ka ri. Ka India da thied ko hadooh 870 tylli kini ki Jet kiwa da embynta ha ka thma u 1965 wa 1971 kamjooh wa ka thma Kargil ha u 1999 wei ha u 2019 ka Balakot Airstrikes wei khaddooh da pynemkaam ya ki ha u Naisan uni u snem heipor ka Operation Sindoor.
Ka MiG-21 da lai luti ko da slem heiwa da chah beiñ ko leh neibhah da em kamwa 480 tylli kiwa haap heipor wa dang hær heiwa da khut ya ka kam ka “Flying Coffin.” Tangwa u Retired Air Marshal Harish Masand uwa yoh ya ka Vir Chakra uwa da hær 2,000 sien ha ki MiG-21, da ong u wa ini i pyrtuid toh wa khut ya ka F-104 Starfighter ka USA.
Ki MiG-21 da siat ki ya ki F-104 Jet ka Pakistan ha u 1971 wei ha u 2019, u Wing Commander (katni u Group Captain) Abhinandan Varthaman da siat u ya ka F-16 ka Pakistan.
Ha kani ka sngi pynchong-ngiah ya ka MiG-21 da emlang u Chief of Defence Staff, u General Anil Chauhan, u heh ka Army, u General Upendra Dwivedi, Air Chief Marshal, u A P Singh wa u Navy Chief u Admiral Dinesh K Tripathi.
Chwa ini ka sorkar da pynbna ko wow thied ya 97 tylli ki Light Combat Aircraft (LCA) MK 1A (68 Fighter wa 29 tylli ki Twin Seater) ya ka Indian Air Force ha i dor wa Rs. 62,000 klur.
Discussion about this post