Yoh kawa na Venezuela ya ka Noble Peace Prize hadien wa dawa u Trump wow yoh ya kani ka khusnaam

U President ka USA u Donald Trump uwa da dawa wow yoh ya ka Nobel Peace Prize deiwa kam wa da ye u wow pynkut hadooh 8 tylli ki thma ha ki 6 bnai nadooh ka thma India-Pakistan, ka thma Thailand-Cambodia wa kiwi de, ym em yoh u ya kani ka khusnaam tangwa da lai ko cha ka Maria Corina Machado kawa man kam kawa yahkhmat ka liang pyrchah ka ri Venezuela.

Ka Nobel Committee kawa da jied ya kiwa jop, da pynbna ki yeini ynne ka sngi wa ka Noble Peace Prize 2025 u lai ko cha ka Maria Corina Machado yei kreh chitom ko wow pynyoh yei hok ki bru ka ri Venezuela yow wanrah da ka synchaar paidbah (Democracy) deiwa pynkut noh ya ka synchaar samen bru (Dictatorship).

U Chairperson ka Nobel Committee, u Jørgen Watne Frydnes hawa kylli yei daw wym em jied ya u Donald Trump, da ong u wa ka Committee chong ko ha ka kamra wa em kiwa da jop nachwa kiwa man ki bru wa chlur wei kiwa yieñ skem wow yaleh yei hok.

Da ong u leh wa i rai toh iwa chim deiwa bood ya ka yurim wa kreh u Alfred Nobel.

Ka Machado (58 snem) da tip ya ka leh kam ka Iron Lady ka Venezuela wei da hap ko wow yut rieh hadien wa pynman ya ka Election ynnin u snem kawa da pynbaad kiwa boon toh ka Election kawa deiwa leh thok da u President wa kattæ u Nicolas Maduro.

Related posts

U kyntait ka Dorbar Chnong Lapangap yei klam yasuk wa ki Karbi lada booh kyndon biang ki

October 10, 2025

Lada ym yoh kiwa chong chnong ka Lapangap u ah kba pynyoo wa da man kiwa da yap

October 10, 2025

Ki President ka US kiwa dadep yoh ya ka Noble Peace Prize toh u Theodore Roosevelt, u Woodrow Wilson, u Jimmy Carter wa u Barack Obama.

Ka Noble Committee da ong ko wa i thap pyrtuid ya kiwa ye u yoh ya kani ka khusnaam da kut ko ha ka 31-01-25 iwa man 10 sngi hadien wa man biang u Trump kam u President.