Ka Sahlyngkhot Lyngdoh Lumputhoi Memorial Knock-Out Football Tournament, 16th Cash Prize Money Invitation Football Tournament -2025 kawa pynlai da ka Lumputhoi Sport Club da pynhaap pyrda ka ha ka 11 tarik uni u bnai ha Lumputhoi Playground.
Ha kani ka sngi da wan wow pynkut ya ka Tournament da u MLA ka thaaiñ u Kyrmen Shylla kam u kongsan, u MDC ka thaaiñ uwa man leh u Dy. Chairman ka JHADC, u Wailad Dameshwa Siangshai kam u symbood kongsan deilang wa ka E. Sangma kawa man ka Assistant Commissioner, East Jaiñtia Hills District kam kawa chah khut kyrpang.
U Kyrmen Shylla kam u kongsan da kyntu kynpham u ya kiwa yalehke wow man ki kiwa kreh chitom wow pynkhreh namo wow Practice khnang yow nang ku ki chaphrang ha jar jiar ki sap wa da e u Blai ya ki. U man ki leh kiwa yalehke kiwa kiar na ki kaam wa sih kawa ye u pyntroiñ ya ka met ka phaad yong ki kawa pynsihdur pyndooh burom ya ka imlang sahlang. Da kyntu u leh ya kiwa ksoh kaam Sport wow nang thooh ki laad ki luti kammon u pynbha pynmiat ya kani ka Tournament deiwa ya krehlang wa ka dorbar chnong kamjooh wa ki chnat sorkar waphær waphær. Da khana u leh wa ya ki kot ki sla wa da e ka dorbar chnong cha oo neibynta u yarap ya ki kaam pynroi, da kular u wow booddien wei wow yaklam wa ki bor watoh toh u pait khnang yow ye u pynman kaam ya iwa da mut da thmu ka chnong deiwa em ka mynsien yaichah neibhah yow ye u leh heipor wa smat. Da kitbok kitrwiang u ya waroh ar tylli ki liang wa poi Final u yalehke ki dei mynsien wa khooid yow lait nei takha tadan, yow yoosuk kiwa wan sakhilang leh kaamjooh.
U Wailad Dameshwa Siangshai kam u symbood kongsan da e u yei klam yong oo deiwa yaroh ya kiwa ksohkaam yong ka Lumputhoi Sport Club kiwa da ye u pynlai bait pynlai ryntih nadooh wa sdang hadooh ka sngi pynkut. Da ong haroh u wa kani ka Tournament yong phi man ko kawa rap phær na kiwi tawon katkam i yoo jngai pait jngai yong kiwa pynlai ya ka. Da khana u leh wa oo kam uwa mihkhmat yong kani ka chnong smat u leh wow yakrehlang chirup chirup khnang yow pynku ya ka sap ka phong yong kiwa yalehke kaamjooh ya ka Tournament kawa da e rynsan ya kiwa yalehke kat kiwa da wan yalehke ha kani ka Tournament.
Ka E. Sangma da pynsñiaw ko yei sñiawkmen yong ka wow ya emlang ha kani ka sngi, hanla da man ko kawa dang wan thymme cha kani thaaiñ leh, tangwa sñiaw ko kam ka parachong parathaw hi neibhah dang haap i ha ka jooh ka jylla. Da e khublei ko ya kiwa pynlai ya kani ka Tournament, ya ka dorbar chnong, kaamjooh ya ki liang waroh ar kiwa poi cha ka Final deiwa kitbok kitrwiang ya ki waroh u lehbha ki ha jar ka sap wa da e u Blai ya ki.
Ya kani ka yalang da pynlai da u President ka Club, u Ting Lyngdoh, i kyntien maitphang na u General Secretary ka Club, u Midrik Lyngdoh, ki kyntien pdiang burom deilang wa ki kyntien chaphang ka Tournament da u General Secretary Chnong, i klan tbian na u waheh chnong wa i klam e khublei na u Sharak Lyngdoh uwa man leh kaam u waheh chnong warim uwa rap nachwa.
Da pynphooh pynphieñ leh ya kani ka sngi da ka Seiñ Manbei ka wada e i chaad pdiang burom, na ki khynroo khyllood kam i chaad pynwyrngia kamjooh wa na ki khynnah skur.
Ki liang wa poi cha ka Final toh ka Rangad SCSC wa ka Eastern Warrior FT.
Ka yakhun Final wow yaknieh yei naam jop man ko kawa mar yabiang bor hadooh wa kut ka por 85 minit da man 0-0. Kamtæ da rai wow pynman da ka Tie-Breaker heiwa ka Rangad SCSC da jop ko da 6-5 kol ya ka Eastern Warrior FT.
Ka Rangad SCSC kam ka Champion da yoh rah ko ya ka song poisa kawa Rs. 70,000, ka Eastern Warrior FT kaam ka Runner Up da yoh ko Rs. 40,000 katwa ka Suchen Dhana SC da yoh rah ko ya ka naam 3rd Place chirup wa ka song poisa kawa Rs. 15,000.
Discussion about this post