I parom kawi ka manbei wa chlur u man waheh chnong wot hapyrdi i tieñ kiwa boon u chim yeini i kaam

Man ko kayi kayi ka khubor ka wym jooh rap sñiaw hajrong i man chlur ki kynthai wow chimkti næ wow ksoh yei kyrdan waheh chnong khamtam ha ki por nachwa wa dang duna ki kynthai wa mih chakhmat hei kaam wow man kiwa yahkhmat ha ka imlang sahlang næ ka shynchaar khadar, katte wanrah i cha phi ki paidbah hajrong ka parom yong kawi ka manbei wa chlur napoh Ri-loom Jaiñtia kawa da mih chakhmat wow chimkti yei kaam Waheh Chnong wei ini da jia i ha ka chnong Mukhla Umlangshor kawa haap hapoh ka West Jaiñtia Hills District.

Ya kani ka manbei da tip pyrtuid kam ka (L) Lin Sumer kawa da ksoh yei kaam waheh chnong ha u snem 1998-1999 wei kani ka manbei da khlaad noh ko ha ka 06-01-2016.

Yow rap che hajrong i parom kani ka manbei da yoh u hiar cha ka chnong Mukhla Umlangshor yow yaklam wa ki khon ki kti kani ka manbei, kamjooh leh wa u waheh chnong wa katni.

Hei yaklam wa ka kong Yoobha Sumer kawa man ka khon yong ka kong (L) Lin Sumer khana ko wa ka bei yong ka toh kawa da e sap kyrpang u Blai wow man kam kawa yahkhmat paidbah hapoh ka chnong ka thaw, heiwa dei yoobiang wa i e chaniah lang ki paidbah ha kitai ki snem da chim ko ya ka yukit wow man kam ka Waheh Chnong.

Wei hei lai luti ko kam ka Waheh Chnong ka wym em i puræ puthi leh, da ye won ko u leh chiboon ki kaam wa bha ha ka chnong ka thaw kam i pynyoh khoo rachon ya ki paidbah wa chong chnong kiwa maad bha yei eh heiliang u khoo rachon, man ko leh kam kawa saam bam cha ki kynthai khynnah lyngba ka chnat ICDS ka sorkar wa kiwi ki kaam najrong i kaam shynchaar khadar.

Khana ko wa ha kitai ki snem wa man ko kam ka Waheh Chnong nadooh ki chynrang wa kynthai e ki i yakrehlang ha kawon kawon ka bynta, wei kam ka manbei wa hap pait yei kaamram ha-yung katwa ye da yaleh ko u pynbiang ya ki khon ki kti ha yung kamjooh i kaamram ha ka chnong ka thaw.

Chooh chooh ka khon ko da khana ko wa ka leh kam ka khon yoh mynsiem bha ko na ki kaam wa da kreh ka bei ko, heiwa ka leh da boon tylli ki seiñ kynthai yakrehlang ko hapoh ka chnong, najrong wa da boon boon snem embynta lang ko kam ka dkhot EC chnong na uwi u waheh chnong hadien uwi won hadooh katni.

Hajrong kani ka parom yong kani ka manbei (L) Lin Sumer neiliang u Waheh Chnong ka Umlangshor wa katni, u Pynshai Shylla leh hawa pynsakhiat da khana u wa ka (L) Lin Sumer ka bei yong ka kong Yoobha Sumer da man sakhiat ko ka kynthai wa chlur wow chim yei kaam waheh chnong ha kitai ki snem neibhah kiwa boon ki chynrang leh heitai i por ym nood de ki u chim yei kaam waheh chnong neidaw wa em i yakulmar yakynaad hapoh ka chnong ka thaw.

Ong u hanla dang khynnah u ha kitai ki snem tangwa ka parom wa ki kaam wa da kreh ko dang sah naam hadooh katni wei boon na ki bru waheh chynrang wa jooh yakrehlang wa ka leh dang em ki hadooh katni wow khana parom ya kani ka manbei.

Related posts

Ym em de iwon iwon i bynta ka Pakistan wym ye u BrahMos Missile u tne, ong u Rajnath Singh

October 18, 2025

Yap le ngut kiwa yaleh Cricket ka Afghanistan nei dat Bomb ka Pakistan

October 18, 2025

Ha kitai ki snem ong u da pyntyllung ko ya ki kaam wa bha deiwa wanrah ki Scheme sorkar wei wow pynbha pynmiat ya ka chnong ka thaw hei shynchaar khadar wa i chongsuk chongsaaiñ.

U waheh chnong da pynrap haroh u deiwa ong hei kaam wow man kam kiwa yahkhmat paidbah lada toh ya u chynrang næ kynthai ymtoh i kaam wa suk lymtoh deiwa e sap u Blai wei man kiwa chlur.

Wei ka kynthai leh najrong wa man kawa ye u pait u chakri ha ki kaam yung kam sem em won leh kiwa em sap ha kiwi kiwi won ki bynta wow chakri ya ka imlang sahlang.