Ka Meghalaya da pynkhreh ko wow pynku ya ka khayi pateiñ deiwa yarap ya kiwa krep, kiwa seiñ khih wow yoh ki wow pynlai ya ki mar yong ki cha ki yaaw ki haat wa em cha baar ri deiwa chim kabu ya ki Free Trade Agreements (FTAs) ka ri India yow khayi wa kiwi de ki ri.
Heiyatoh wa ini da pynman ya ka State-Level Outreach Programme ha Shillong ynnin ka sngi deiwa em ki bru na ki chnat ka sorkar pyrdi kamjooh kiwa khayi pateiñ wa heh bor yow yarap pynkhlan yei chalan ya ki mar cha baar kamjooh yow pynsñiawthooh chaphang ki kyndon kani ka khayi pateiñ.
Ya kani ka yalang da pynman da ka Commerce and Industries Department ka sorkar Meghalaya deiwa ya krehlang wa ka Department of Commerce ka sorkar India deilang ka Directorate General of Foreign Trade (DGFT) da ka thong wow pynsñiawthooh chaphang ki FTA, ki Export Promotion Schemes kamjooh kammon ki kyndon wa em cha baar ri.
Hawa e yei klam ha kani ka yalang, u Sniawbhalang Dhar, Deputy Chief Minister kamjooh u Minister in-charge ka Commerce and Industries, da ong u wa kini ki FTAs toh kiwa ye u yarap bha ya kiwa rep ka Meghalaya kamjooh kiwa chna wa pynmih ya kiwa boon ki jait mar.
Na ki mar rep da ong u wa u chirmit, u syiñ, u satrooiñ, umngap, ki chken ki siej wa ki mar thaiñ kam ki yusem wa ki riam toh kiwa lai yaaw bha cha baar ri na Meghalaya deiwa kdaw leh yei yajan wa ka Bangladesh heiwa deiwa em ka Land Port ha Dawki kawa emkaam bha.
Da ong u leh wa ka India da soi soskular Trade Agreement ko wa ki ri kam ka UAE, Australia, United Kingdom, Oman, ka European Union wa New Zealand yow ye u ya khayi deiwa laitlooid khlem da boon ki kyndon wei kini ki yaaw ki haat toh kiwa wanrah maar na baar ri deiwa pynlut hadooh USD 8.2 Trillion.
Da klam u leh chaphang ki ar tylli ki Scheme ka sorkar pyrdi yow yarap ya ka khayi pateiñ, kitæ ka Niryat Protsahan wa ka Niryat Disha wei hapoh Meghalaya ka sorkar jylla dang dep ko wow pynman ya ka Reverse Buyer Seller Meet 2.0 ha uni u bnai deiwa wanrah ki bru kiwa na 16 tylli ki ri yow yachem wa kiwa dai mar na Meghalaya kiwa em kamwa 400 ngut na ki 12 tylli ki District heiwa da yasoi hadooh palat 100 tylli ki soskular.
Da khana u leh wa yow pynku ya ka khayi pateiñ najrong ka Integrated Check Post wa em ha Dawki – Tamabil deilang ki Land Customs Station ka jylla, ka sorkar da tyrwa ko leh wow booh ka Land Customs Station wa thymme ha Umkiang, East Jaiñtia Hills wei da tyrwa leh wow pynku kyrdan (Upgrade) ya ki Station wa em ha Bagli, Borsora, Bholaganj, Mahendraganj wa Dalu yow man noh ki kam ki Integrated Check Posts.
Da kyntu u leh ya ka sorkar India wow yarap ko yow wai biang ya ki 5 tylli ki Border Haat wa em ha khappood ka Meghalaya-Bangladesh kamjooh wow pynkrehkaam noh ya ka Border Haat kawa dadep pynchna kawa em ha Huroi, East Jaiñtia Hills.
Discussion about this post