Ki pulit ka UK da pynmih ki yei kyrpaad paidbah yow thooh ya uwi u bru (dohlieh) uwa da suba slaitbor ya kawi ka kynthai kawa em tre na India kawa sah ha Northern England heiwa ki pulit da ong ki wa da jia ini ya ka neidaw donhi wa ka toh kawa phær jaitbru.
Ki pulit ka West Midlands Police da pyntip cha ki wow wan cha Park Hall ka thaaiñ Walsall hei janmiet ka 25 tarik neidaw wa em iwa jia ya ka kynthai kawa em ha ki rta 20 snem. Ki pulit da pynlait ki leh ya ka Video wa riñ da ka CCTV wa pynyoo ya uni u bru wa suba emkti deiwa ong wa ini iwa jia toh neidaw wa kani ka bru phær jaitbru ko.
Uni u bru wa leh yeini i kaam toh uwa da antaad wa em 30 snem i rta, uwa tbian sñiooh wei kani ka kynthai wa chah slaitbor toh ka Punjabi wei ini da jia i du hadien kattu katni tayaaw wa chah slaitbor ka kynthai Sikh ha ka thaaiñ Oldbury.
Ka thaaiñ Walsall toh kawa em boon ki jaitbru wa sah, wei ki pulit da pynchlur ki ya ki bru wa tipmit ya uni wa leh yeini i kaam wow pyntip ki.
Ka Sikh Federation UK da pyntikna ki wa kani ka kynthai toh ka Punjabi wei uni u bru wa leh yeini da tympra u ya ka dwar i yung wa sah ko. Da ong leh wa ki pulit ka West Midlands da em ha kti ki kattu ar sien i chah slaitbor du neidaw wa phær jaitbru hapoh chi bnai.
Ha i chah slaitbor iwa jia ha Oldbury da kem ki pulit ya ki kattu katni tangwa da yoh jamin noh ki.
Discussion about this post