Ka Amwi Ar Lyngdoh Jaraiñ Private Market kawa jooh tip kam ka yaaw Jaraiñ da wai biang ka ha ka 27 tarik uni u bnai da u Lahkmen Rymbui, MLA ka Amlarem Constituency kam u kongsan deiwa emlang u Medling M. Swer, EM ka JHADC, u Jemiwell Pyrtuh, Dolloi ka Elaka Amwi, ka R. Syiemlieh, SO ka JHADC chirup kiwa mihkhmat na ki soo tylli ki dorbar chnong, ki dkhot ka Managing Committee wa kiwi de.
U Lahkmen hawa e yei klam da ong u wa kmen u wow yoo wa da wai biang ya kani ka yaaw neibhah wa man ko kawa emkaam bha neibynta kiwa chong chnong ka thaaiñ deiwa yooluti u leh wa daw pynku ko ya ka kamai kajih wa ka khayi pateiñ ki chnong wa em chajan.
Da khut u leh yeiwa emkaam wow pteiñ yei ya krehlang wa kiwa pynlai chnong deilang ka Managing Committee wa ki bor wa toh u pait yow lai bait i krehkaam kani ka yaaw.
Neiliang u Dolloi leh da pynsñiaw u yei kyrchaan yow wai biang ya kani ka yaaw deiwa ong wa ini pynyoo ko yei yatylli wei ya krehlang ki soo dorbar chnong yow pynkrehkaam ya kani ka yaaw.
Neiliang ka R. Syiemlieh, SO ka JHADC da khana ko wa kani ka yaaw Jaraiñ toh kawa da krehkaam nadooh ki snem 1980 tangwa neidaw wa mih i kajia hapyrdi ki soo dorbar chnong nadooh u snem 2017, da hap khang noh ya kani ka yaaw da ka hukum wa pynmih ka EC ha ka 3 tarik u August, 2023.
Tangwa deiwa em i ya sñiawthooh hapyrdi ki soo dorbar chnong da wan pyntip ki cha ka Council ha ka 12 tarik u May, 2026, kamtæ da wai biang ya kani ka yaaw hadien wa pyndep yei leh sorjamin ha ka 15 tarik u June 2026 heiwa da pynkylla leh yei pyrtuid ko kam ka Amwi Ar Lyngdoh Jarain Private Market, wei ya ka soskular da soi ha ka 10 tarik u August, 2026.
Ya kani ka yaaw u wai ka chisien chi tayaaw.
Discussion about this post