Uwa yalehke ka Meghalaya ha ka Ranji Trophy da yoh u ya ka 50 Run wa smat dooh na ki 11 bol deiwa man leh uwa le wa ye u dat 6 tylli ki 6 Run ha ka chi Over wei da yoh u leh wow dat sa ar tylli ki 6 Run ha ka Over wa bood iwa mut waroh 8 tylli ki 6 Run kawi hadien kawi wei kani da man ko ka sien nyngkong wa em wa ye u leh kamni ha ka First Class Cricket.
Kani ka yalehke toh hapyrdi ka Meghalaya wa ka Arunachal Pradesh kawa dapoi cha ka sngi wa ar ynne kam chibynta ka Ranji Trophy 2025-26 Plate Group Match kawa da pynman ha Surat.
Uni uwa yalehke ka Meghalaya toh uwa tip kam u Akash Chaudhary wei da wan u wow Bat hei wa phra heiwa da dat u ya ki bol u Limar Dabi da 6 tylli ki 6 Run wei ar ngut kiwi kiwa da ye u leh yeini toh u Garry Sobers wa u Ravi Shastri.
Ka Meghalaya haka 1st Innings da sangeh ko wow kamai deiwa yoh 628/6 heiwa ka Arunachal da jubab ko deiwa yoh 73 Run donhi heiwa da phah wow Bat biang ko wei hadooh wa kut ka yalehke ynne ka Arunachal da yoh ko 17/3 ha ka 2nd Innings, deiwa bood da 526 Run nadien.
Ynnin ya ka Meghalaya da em le ngut kiwa da lehbha da ka Bat, kitæ u Arpit Bhatewara 207 (273 balls, 23x4s, 4x6s), u Kishan Lyngdoh, 119 (187 balls, 14x4s, 1×6). Kini ki ar ngut dapdep ki wow yoh kamni i jooh pyrchah ya ka Sikkim ha Shillong ynnin u bnai.
Sa uwi toh u Guest Professional u Rahul Dala uwa da yoh 144 na 102 bol (12x4s, 9x6s).
Na kiwa kawang bol ka Meghalaya da lehbha u Aryan Borah 4/16, u Dippu Sangma 2/16 wa u Aaron AR Nongrum 2/28 deiwa yarap na u Swastic Chettri (1/3) wa u Akash (1/10). Hadien wa Bat biang ka Arunachal, u Akash da yoh u 2/7.
Discussion about this post