Chem ka KSU lyngba ka RTI wa u VC ka Law University pynlut u Rs. 3 lak kam ka bai kiad | Rs. 15 lak tam hei lai i wan

Ka KSU ynnin ka sngi da yachem ko wa u Lahkhmen Rymbui uwa pait ya ka Law Department yow ujor pyrchah ya u Vice Chancellor ka National Law University (NLU) ka Meghalaya, u Prof. Indrajit Dube deiwa pynbaad wa pynemkaam bakla u ya ka poisa ka University wei yeini da chem lyngba ka RTI wa dadep yaleh wei kini da man ki kam ki sabut wa biang yow pyndam noh yei man u kam Vice Chancellor.

Ka seiñ da ong ko wa chwa ini dadep ko wow thoh chaphang i jooh cha ka sorkar heiwa da kular wow thung da ka takit hapoh ar bnai tangwa kattu da dap 6 bnai wei ya uni u VC ym em wa pynchitom oo wei da pteiñ u yei kaam u klem da em wa pait ya ki baam tooh u.

Da kdaw wa katkam ka RTI, da chem wa uni u VC da pynlut u Rs. 15,10,347 hawa lai wa wan u yei kaam yong oo samen ki wym emyatoh wa kani ka Law University ka jylla.

Da pynlut u Rs. 3,56,750 kam ka bai kiad ha ka yalang wa tip kam ka “Climate Investment Coalition for the Global South” kawa da pynman ha ka 20-02-25 ha Delhi.

Chooh chooh da ong wa uni u VC chim chuti u katwa ngait u khlem wa pait yeini katwa ya ka tulop yoh u thij khlem chah khate.

Related posts

Dai pyrchah aiñ cha u baar jylla yei thaw wa em ha Daistong yow sdang ya ka Shree Cement: JNC

November 28, 2025

$240 Million u chim ram ka Meghalaya na ka World Bank yow pynchna sarok wa kiwi de

November 28, 2025

Da chem leh wa lyngba ka RTI da pynlut Rs. 46,83,500 kam ka tulop wa Honorarium kawa Rs. 1,50,000 chi bnai wa Rs. 8,26,301 yei bai lai bai wan ki le ngut ki Professor of Practice, uwi u Associate Professor in Residence wa ar ngut ki Professor in Residence ki wym jooh em chim Class næ chim Lecture. Wei kini kiwa chah thung kreh toh deiwa leh chiliang deiwa em kiwa tipmit ki.

Neiliang ka seiñ da ong ko leh wa dang boon kiwi de ki kaam wa da leh kiwa khlem bood ya ka Reservation Policy hawa thung kreh deiwa thung kreh u VC da ki bru yong oo heiwa da booh u leh ki kyndon wa khor bha manda yaleh kreh yow lait ki tre chnong u yoh kreh yow ye u thung da ki bru wa kwah u.

Ka seiñ da kdaw ko leh wa u VC daw kut noh i por u ha u February 2026 wei katkam ka aiñ, u VC wa nyngkong toh u ye u wow ksoh yei kaam 3 snem donhi, kamtæ da kyntu ya ka sorkar wym toh u e laad wow pteiñ u yeini i kaam wei wow pynchitom oo katkam ka RTI wa da yoh.