Ki bor pait bor pynlai ka Meghalaya Bharat Scouts & Guides, West Jaiñtia Hills Distrct da pynman ki ka yalang pynskem næ Induction Ceremony ya ka Dr. Wa I Sa Sumer, District School Education Officer, West Jaiñtia Hills ka wow chimkti noh yei kaam neini chakhmat kam ka District Chief Commissioner, Bharat Scouts & Guides West Jaiñtia Hills.
Ha ka yalang yong kani ka sngi wa da pynman ha kamra krehkaam ka DSEO, West Jaintia Hills hei pynlai ka Emidaka Lyngdoh, District Organising Commissioner (G), MBS&G-WJH hei emlang leh u Richard B Uriah, Vice-President, MBS&G, West Jaiñtia Hills da yoh yei klam yahkhmat na ka C.D. Laloo, District Commissioner Guides, MBS&G-WJH, i klam tbian chaphang ka Scouts-Guides Movement da ka Saramai Tariang, Vice-President, MBS&G-WJH katwa u Adiam U Bthuh, District Secretary, MBS&G-WJH hei pynkut da e u ki kyntien khublei.
Katkam ka rukom dustur yong ka Scouts-Guides Movement ya i pynksem dkhot ya ka Dr. Wa I Sa Sumer, DSEO, West Jaiñtia Hills da pyndep da ka Siami Shylla, District Training Commissioner, Guides, MBS&G-WJH.
Ka Dr. Wa I Sa Sumer hei klam dap ko dei sñiawkmen wow yoh laad u embynta wa ka Scouts-Guides Movement kawa man ka seiñ wa yieñ u kreh ha ka yurim i miat i bha ki khynnah wa ki khynroo khyllood wa em ha ki thaw puræ.
Ong ko leh man iwa sñiawsuk u tip chaphang ka Motto yong ka Movement wa ong “Be Prepared” iwa mut u man kiwa da pynkhreh heiwon heiwon i por. Kyrmen yooluti ko leh wa i embyntalang wa ka Movement kam kawi na kiwa yahkhmat hapoh ka District wei dei yakrehlang u ye u kyntu kynrong ya ka Scouts-Guides ha ki por ki sngi wa chakhmat.
Chooh chooh neiliang ka Dr. Wa I Sa Sumer ha kani ka sngi kam kawa yahkhmat yong ka Scouts-Guides Movement hapoh ka District ha ka thong yong ka Constitutional Day da pyndep ko leh i yahkhmat hei purae ya ka Preamble yong ka Indian Constitution hei chimbyntalang da waroh ki dkhot.
Discussion about this post