Kam chibynta ka National Campaign for Gender Equality næ i pynsñiawthooh paidbah ha kylleiñ ka ri India wa ki kynthai leh toh u yoh ki ka jooh ka hok ha ka imlang sahlang, ynne ka sngi ha West Jaiñtia Hills District leh da sdang yeini i pynsñiawthooh paidbah hajrong ka phang wa ong, “Women Leading the Way; Economic Empowerment for Inclusive Growth Towards a Viksit” ya kawa da pynman da ka District Mission Management Unit, WJHD.
Yeini i pynsñiawthooh paidbah ha West Jaiñtia Hills da sdang dei lai paidbah na Kiang Nangbah Stadium, Jowai wei da pynkut ha District Library Mynthong, heiwa da chimbynta da kiwa boon ki kynthai ki manbei na ki SHG waphær waphær ka West Jaiñtia.
Ha ini i lai paidbah ki kynthai ki manbei da rahlang ki leh ya ki Placard wa da thoh yei kyntien waphær waphær iwa yatoh wa ka hok yoh bynta salonsar ki kynthai ha ka imlang sahlang, wei wow sangeh i lehbeiñ i thombor ya ki.
Da kbai haroh ki ya ki kyntien wa thoh “Kyrchaan ya ki kynthai kyrchaan ya ka jaitbru”, “Kyrchaan ya ki kynthai yow ku ka ri”, “I pynkupbor ya ki kynthai pynku ko ya i yoh i la”, “Ka hok yoh byntalang u sdang ko deiwa burom kylliang”, “Lada khlan ka kynthai ka mynried leh u khlan ko”, najrong kiwi de iwa da thoh.
Ha ka yalang wa da pynman ha District Library, won ka B. Blah, Project Director DRDA & Nodel Officer DMMU West Jaiñtia Hills kam ka kongsan da yaroh ko ya ki chnat krehkaam sorkar kam ka Social welfare, ka District Legal Service, ka District Mission Management Unit wa ya ki waheh chnong kiwa da e kyrchaan ya kani ka Campaign ha ki chnong ki thaw yong ki.
Hawa pynsñiaw won hajrong i emkaam u yoh kajooh ka hok, ka B. Blah da pynrap ko deiwa ong ka imlang sahlang yong i toh kawa burom bha ya ki kynthai ki manbei, tangwa dang boon won ki kynthai wa maad yei eh i khor neiwa chah thombor hapoh ka yung ka sem wa kamjooh leh i pyrchang khanglaad ya ki ha ki bynta waphær waphær.
Tangwa kamwa kani ka Campaign toh kawa da sdang ha kylleiñ ka ri hajrong ka thong u pynsñiawthooh wei wow leh iyi ræ iyi neibynta u pyntikna wow yoh ka jooh ka hok, ngait skem ko wow man iwa jop.
Wei lyngba i lai paidbah ynne ka sngi leh ong ko wa da man iwa yarap hi ya ki paidbah u sñiawthooh ki hajrong i emkaam u yoh ka jooh ka hok.
Chooh chooh yow rap che hajrong ini, da pynrap ko deiwa ong ki chynrang leh man ki kiwa emkaam bha heiyatoh wa kani ka bynta, wei kamwa em jar jiar i bynta hapyrdi ki kynthai wa chynrang emkaam leh ya ki u yakrehlang chirup chirup.
Neibhah ha ka manyung leh ym ye u em du ki kynthai næ u em du ki chynrang khnang yow lai bait i kaam i jaam wei yow ku ka yung ka sem emkam yei kitkhliehlang wa i yakrehlang chirup chirup kynthai wa chynrang.
Discussion about this post