Ka National People’s Party (NPP) ha Nartiang Constituency da chna parom ko deiwa pynpsiah wei pdiang ko ya palat 3000 ngut kiwa yahkhmat wa kiwa kyrchaan yong kiwi ki seiñ saiñpyrthai hawa ka Election wa daw wan dang sah sa 2 snem.
Kini kiwa kyrchaan kiwa da pyndap smam ya ka Community Hall yong ka chnong Wahïajer, kynthup ki kamwa 700 ngut kiwa kyrchaan ka Voice of the People Party (VPP) wa palat 70 ngut kiwa yahkhmat ka Congress wa kiwi de kiwa da uiñ biang ki hadien wa lai ki wow kyrchaan ya kiwi ki seiñ ha ki Election wa dadep.
Ya kini waroh da pdiang sñiawbha da u MLA ka thaaiñ uwa man leh u Symbood Montri Rangbah ka jylla, u Sniawbhalang Dhar ha ryngkat kiwi kiwa yahkhmat ka NPP Nartiang Block.
Ha kani ka yalang da yoh yei klam na uwa yahkhmat warim ka VPP ha katai ka thaaiñ uwa man leh u waheh chong ka Umjalasiaw, u Kner Siangshai uwa da ong wa katkam i chem yong oo, da chem wa ka VPP da yahbakla ko ya ka jaitbru wei toh ka seiñ kawa pynchongchit wei kawa pynkulmar yei pyrkhat pyrdaiñ ki paidbah.
Neiliang u Sniawbhalang hawa e yei klam da pynsñiaw u yei kmen wow pdiang ya ki dkhot wa thymme wa ki warim kiwa da psiah cha ka NPP.
Da ong u wa ha ka Politics i lai luti ymtoh iwa suk, wei heipor Election ym mut wa waroh ki paidbah u em ki ha ka jooh ka lama, wei da ong u leh wa u chim u yei kitkhlieh wei ym pynbaad u ya kiwon kiwon lada ki paidbah jngai ki na oo, tangwa chim u wa toh i bakla yong oo wow kreh yei kaam.
Da ong u leh wa i kmen toh wa ki paidbah ym ksoh nood ki yeiwa bakla u wei da wan mih ki wow yaklam wei kyrchaan biang ya oo, kawa man ka dak kawa emkaam dooh.
Discussion about this post