Ka East Jaiñtia Hills District da yoh ko sa kawi ka madan Futsal heiwa ynne ka sngi da wai paidbah ya kawa em ha chnong Byndihati kawa da pynchna hapoh ka District Mineral Foundation (DMF) Scheme deiwa emlang u MLA ka Khliehriat, u Kyrmen Shylla kam u kongsan.
U Kyrmen hawa e yei klam da yaroh u ya ka yung krehkaam u DC wa wanrah ki ya kini ki madan Futsal deiwa ban joor leh yeiwa emkaam wow sumaar wei pynneh ya kani ka madan wei da khut u leh ya kiwa chong chnong ka Byndihati wow wan ki chakhmat neibynta ki kaam pynroi wa emkaam ki.
Neiliang u DC da pyntip u wa kani toh ka madan Futsal wa chiphaw kawa dadep wai hapoh ka District wei da em sa le tylli kiwa dadep chna wei daw wai noh ki ym slem de.
Da pyntip u leh wa deiwa pynemkaam da ka poisa hapoh ka DMF, da ye wow pynchna yeiwa da sih ha kamwa 50 tylli ki skur, da pynman leh ya ki Winter Camp yow pynsñiawthooh yei maa wa mih nei pynemkaam drugs neibynta ki khynnah Class VIII hadooh Class XII.
Da pynchna leh ya kiwa boon ki thaw sumaar kam ki Primary Health Centre (PHC) wei da ye leh wow thied ya ki tiar ki tar neibynta ka Civil Hospital Khliehriat lyngba ka DMF.
Discussion about this post