Ha ka 12 tarik uni u bnai, ka Phramer Saphai Umrangso Tourist Vehicle Association da yoh ko wow wai paidbah ya ka Association ko ha Phramer, West Jaiñtia Hills ha ka yalang wa da pynlai da u Tngen Lyngdoh wei kani ka seiñ kamai kari toh kawa dang dep Register wa ki bor sorkar.
U President ka Association, u Shemphang Dhar hawa e yei klam da e khublei kyrpang u ya kiwa yah kari waroh kiwa em ha kani ka Association wa lyngba yong ki da ye u pynman ya kani ka sngi kawa jop.
Hachwa wow ah ya u Ribbon kam ka dak wow wai ya kani ka Association da yoh i klam na kiwa boon wa kynthup ya u B. Tang, Waheh Chnong Thadmuthlong C Phramer, u Paila K Lyngkot uwa man kam u President yong ka All Jaintia Commercial Vehicle Association, u Waheh Dong ka Dong Phramer, u Waheh Chnong ka Muthlong-A, u Wil Dkhar, President ka Pasyih Tourist Association wa kiwi kiwi ki waheh wasian kiwa chah khut sñiawbha cha kani ka yalang.
U Major P. Suchiang uwa wan na ka Phramer Traffic Cell hachwa wow ah ya u Ribbon kam ka dak wow wai paidbah ya kani ka Association, da pynkynmoo u wa kam kiwa yah kari emkaam wow man ki bru kiwa em ka Discipline ha ki liang waroh. Da ong u leh man ko ka sngi wow sah kynmoo wa da wai ya kani ka Association kawa man kawi na ki kaam chakri ya ki paidbah wa lai wa wan.
I thmu yong kani ka Association toh wow pynsuk ya kiwa lai wa wan na Jaiñtia Hills chadooh cha Assam. Wei ka Association da ngaitskem ko wa deiwa em ko daw ye u chakri rap miat ya ki paidbah kiwa pynemkaam da ki kari kamai.
Kani ka Stand toh kawa em hajan ka Traffic Police Point ha Phramer. Kamtæ kiwon kiwon kiwa kwah wow lai chadooh Umrangso ye phi wow chong da kini ki kari kamai kiwa em ha kani ka Stand.
Ya ki kyntien kyrkhu kyrdoh chwa wow pynwai ya ka yalang da yoh na u Morning Tang, Secretary kani ka Association.
Discussion about this post