Ka Meghalaya Basin Management Agency (MBMA), District Project Management Unit (DPMU), West Jaiñtia Hills deilang ka State Project Management Unit (SPMU-CDP), Shillong da pynman ki ya ka yalang wow saam ya ki kari wa ki kor rep “Farm Machineries and Agri Response Vehicles (ARVs)” hapoh ka Horticulture Cluster Development Programme (CDP) West Jaiñtia Hills District.
Ya kani ka yalang da pynman ha ka 22 tarik uni u bnai ha Laskein C&RD Block Hall deiwa kyrchaan poisa da ka National Horticulture Board (NHB) wa ka Planning Department ka sorkar Meghalaya.
Da wan wow embynta ha kani ka sngi kam u kongsan da u MLA ka Raliang, u Comingone Ymbon wa u F. Passah, Assistant Commissioner, West Jaiñtia Hills kam u symbood kongsan chirup kiwi de.
Waroh da saam 111 tylli ki kor rep nadooh ki Power Tiller, Power Weeder, Portable Power Spray, Brush Cutter wa kiwi de deilang wa 7 tylli ki kari Agri Response Vehicles (ARVs) cha ki Community Based Organisations (CBO) hapoh ka Cluster Development Programme. Wei kini ki kor toh kiwa ye leh u chim wai hei dor wa duna lyngba ki 12 tylli ki Custom Hiring Centers (CHCs) wa em hapoh ka Cluster.
Kini 7 tylli ki kari Agri Response Vehicles toh yow yarap ya ki warep wow kit ya ki mar na ki thaw rep cha ki thaw pynkhooid, thaw song kamjooh ki yaaw ki haat wa lai dai ki.
U MLA hawa e yei klam da ong u wa da saam ya kini ki kor, ki kari yow yarap ya ki warep yow pynku yei rep kamjooh yow pynsuk heijooh i por yow pynku ya ka nong wa yoh ki, kamtæ da kyntu u ya ki wow chimkhia ki yeini.
Discussion about this post