Ha ka 22 tarik uni u bnai heipor kamwa 7:20 i miet, da pyntip cha ki pulit wa em ki bru wa boon bha na kawi ka jaitbru kiwa da psiah cha kawi ka chnong Gomaijhora kawa man ka chnong ki jaitbru ri-loom ka West Garo Hills District.
Kamtæ da lai ki pulit ka Phulbari Police Station deiwa yahkhmat da u Circle Inspector wei manda poi ha kani ka chnong Gomaijhora da chem wa hei janmiet katai ka sngi uwi u bru wa tip kam u Saif Ali uwa na ka chnong Gudibala da dai u ya ki masi u cha u Bablu uwa na ka chnong Rajpur wa em hapoh ka Phulbari Police Station wei heipor wa u Bablu dang lai yah u ya kini ka masi cha chnong u, manda poi hajan ka chnong Gomaijhora kawi na ki masi da lait ko wei da phet ko cha kawi ka lyngkha.
Manda kdong u ya kani ka masi da em kiwa chong chnong kiwa yoo yeini wei da suba ki wa uni u bru toh uwa tooh masi kamtæ da kdong ki oo wei da poor ka khubor yeiwa em u bru wa tooh masi hadooh wa hær ryngu kiwa chong chnong ka Gomaijhora.
Ki pulit hei takit ki da chem ki wym em itæ i tooh masi wei da thied ya ki masi katkam ka aiñ.
Da pynche leh wym em iwon iwon i yachoh yadat hapyrdi ki ar jaitbru næ i pyrchang wow pynthut yei suk i saaiñ wei ini waroh da jia i du neidaw wa em i sñiawthooh bakla.
Hanla kattæ leh da booh ya ki pulit wow em ki ha kani ka chnong yow lait u jia iwon iwon.
Da kyntu leh ya ki paidbah wym toh u ngait ki kat ya iwa em hi-eh iwa sñiaw ki khlem da ye u pyntikna.
Discussion about this post