U Wailadmiki Shylla, Montri ka chnat i chait i khiah wa ka Sports & Youth Affairs ka sorkar jylla hawa embynta kam u kongsan haka dorbar pyllun ka Kur Shylla kawa da man ha ka 24 tarik ha chnong Mukhla, West Jaiñtia Hills District, da pynsñiaw u i kmen wow yoo hajrong i nangku ki para kur haki liang waroh.
Hawa e yumut yaka seiñ kur wa ki para kur u lai ki chakhmat ha ki kaam wa bha, da pynkynmoo haroh u yei im yong oo hi, wa na u khonswet, cha uwa pep puræ Doctor, nei kreh mylla cha i kaam MLA wa kam u Montri sorkar katni.
Neitæ hawa pynsñiaw u yei man smat u wow yarap la haka kur næ kiwon kiwon ki bynta, ym mut wa mahajon u tangwa toh wym mylliñ u ya oo hi kammon man u haki 10 snem nachwa.
Ong u wa i em bynta yong oo wow yarap haka imlang sahlang ymtoh du hadien wa man MLA u tangwa nadooh i por wa dang kreh mylla u leh jooh pynlang u kajiak neiwa yoh u yow yarap yaki kaam haka imlang sahlang katkam i bor wa ye u.
Kamtæ kyntu u ya waroh kiwa emlang lada kiwa dooh næ mahajon leh toh u e yarap bait hi haki kaam imlang sahlang katkam i bor wa ye.
Heijooh i por pynsñiaw u i diaw hajrong i ku kiwa dih drugs, i boon ki manbei wa chah ieh kurim, neitæ i chongkha khynnah hapoh 18 snem.
Heiyatoh wa ini ong u da toh i por wow chong pyrkhat, wei kyntu u leh yaki manbei manpa wow pynlut por ki wa ki khon ha yung neibynta u yaklam khana, ym u chah shynchaar haki Mobile Phone, khnang wa ki khon u lait ki na i sih wa boonjait.
Ha kani ka sngi da yoh leh i klam na ka Joplin Shylla, Secretary Kur Shylla East Khasi Hills, na u Pyrkhat Shylla President ka Kur Shylla wa kiwi.
Neitæ kam ka dak i e mynsien ya ki khon ka kur da pynkup burom leh ya kiwa poi chakhmat hei puræ puthi wa kiwi ki kaam, wei da yoh leh i klam na kiwa chah pynkup burom.
Da pynphooh pynphieñ ya kani ka sngi da i chaad i rwai na ki khon ka kur.
Discussion about this post