Khang ka Tuber Kmaishnong ya kiwa chongdai madan wow wan dai cha ka thaw pynman Fete

Ka Dorbar Chnong Tuber Kmaishnong da pyntip ko wa ha ka 31 tarik u January 2026 kawa man leh ka sngi wa ar ka Fete heiwa daw em em leh ka Bumper Housie kawa Rs. 55 lak, da pyntip wa ya ki dukan dai baam dai cha toh kiwa dadep wow dai lilam chwa.

Kamtæ ym chah ya kiwa chongdai madan wow wan ki chajan ka thaw pynman Fete ka dorbar chnong tangwa u chah u chongdai ki deiwa jngai chi Kilometer na ka thaw pynman Fete ha Moosyller Tuber Kmaishnong.

Lada chem wa em ki wa leh tam, ka Dorbar Chnong Tuber Kmaishnong daw leh ko yeiwa emkaam, kamtæ da kyntu wow sñiawbha u ya krehlang chirup ha katai ka sngi.

Kani ka Fete man ko neibynta wow pynmih poisa yow pynlai yei jakhlai hapoh ka chnong ka thaw khnang yow man ka chnong kawa khooid wa suba yow lait naka la’ær wa tngit.

Heijooh i por ka Dorbar Chnong Tuber Kmaishnong da sñiawburom ko ya ka Dorbar Chnong Shohshrieh kawa man ka para marjan chnong kawa em leh ka thaw psiah thaw mih wei deiwa ya krehlang wa ka deilang ki tre thaw da ye wow pynman ya kani ka Fete.

Kam wow pynkynmoo wa ha ka 30 tarik daw pynyoo ya ka phlim wa pyrtuid ‘Raibi’ ar sien ha ka Community Hall ka Tuber Kmaishnong heipor 7:00 waje i miet wa heipor 10:00 waje i miet wei ka bai Ticket man ko Rs. 100 kawi.

Ha ka 31 tarik ya ka Fete u pynman ha Moosyller Tuber Kmaishnong wei daw wan pynwyrngia da uwa rwai wa bna naam wa tip kam u Arman Disiar, u DJ Exitosa deilang kiwa chaad wa pawnaam ka Jaiñtia Hills wei daw pynkhle leh ya ka Lucky Draw.

Heipor 12:00 waje pyrdi sngi daw sdang da ka yadaw masi.

Heipor 8:30 i miet chwa wow pynman ya ka Bumper Housie daw em kawi ka Free Housie heiwa kiwa dadep thied ya ka Card neibynta ka Bumper Housie daw yoh ki u chimbynta khlem da thied ya ka Card iwa mut lada thied ki kawi ka Card lane le tylli ki Card neibynta ka Bumper Housie daw yoh ki wow yaleh ya kani ka Free Housie deiwa khlem da thied Card de heiwa daw yoh mynkna ki kawi lane le tylli ki Card katkam wa thied ki ya ka Bumper Housie.

Kani ka Free Housie ka Pool Prize dapoi ko Rs. 1,50,000 heiwa ka Full House man ko Rs. 1,00,000 neitæ ka Jolly5, Corner, Top Line, Middle Line wa Bottom Line man ko Rs. 10,000 uwi.

Ka Bumper Housie kawa Rs. 55,00,000 ka Pool Prize u dai ya ka Card hei dor wa Rs. 2500 kawi wa Rs. 5000 won le tylli wei u sdang ko nadooh 11:00 waje i miet ka 31 tarik wei ya kani ka Pool Prize da yabhah kamni.

1^st House- Rs. 20,00,000

2^nd House- Rs. 8,00,000

3^rd House- Rs. 4,00,000

4^th House- Rs. 3,00,000

5^th House- Rs. 2,00,000

6^th House- Rs. 1,00,000

7^th House- Rs. 1,00,000

8^th House-Rs. 1,00,000

9^th House- Rs. 1,00,000

10^th House- Rs. 1,00,000

Daw em leh ka Bad Luck kawa Rs. 6,00,000 heiwa ka 1st Prize man ko Rs. 3,00,000, ka 2^nd Prize won Rs. 2,00,000 katwa ka 3^rd Prize won Rs. 1,00,000.

Kiwa kwah wow tip bniah ye ki wow Phone ha kini ki Number-8837264768, 8787788094.

Kamtæ da khut sñiawbha ya phi wow wan cha kani ka Fete.

I pyntip na u Waheh Chnong, u Jiedlang Sana.