Kiwa yahkhmat ka chnong Hingaria, East Jaiñtia Hills District da lai booh ki dei thoh wei yow paan pynche leh heiyatoh wa i chah kyrriah thaw ka Sub-Centre kawa da mang wow chna nadooh u snem 2023-2024, tangwa hadooh kattæ leh neiliang ka yung krehkaam u DM&HO ym pu em pynkreh ko iyi iyi leh.
Ka seiñ da yoh ko yei pynche wa ya kani ka Sub-Centre da kyrriah cha kawi won ka District neidaw wa i thaw wa da e ka dorbar chnong toh ka wym pu biang.
Tangwa da ong wa da phylla won wa wot kiwa yahkhmat chnong ym tip ki yeini wym biang i thaw wa da e ka chnong tangwa da leh dei bor wow pyndooh ya kani ka Sub-Centre kawa da yooluti kiwa chong chnong da slem.
Ka chnong Hingaria toh kawa em ha khappood wa ka Bangladesh kawa em bru kamwa 2000 tam hadooh wa hap ki bru wow lai cha chilliang u pood ka ri India yow yoh yei chah sumaar ha kitu ki por neidaw wa ka luti syngkieñ leh toh ka wym pu biang wow lai chadooh Khliehriat, Jowai lane Shillong. Tangwa hadooh kattæ neiliang ka sorkar ym pu em kyruiñ ko cha kani ka thaaiñ khamtam heiyatoh wa i chait i khiah.
Ha u snem 2023-2024 ka sorar da Sanction ko ya kani ka Sub-Centre ha chnong Hingaria hapoh ka Scheme PM-ABHIM (2nd Phase) iwa da pynkmen wei da yoh yaroh leh ka sorkar yeiwa bien ko wow pyrkhat yei chait i khiah kiwa chong chnong kani ka thaaiñ khapood tangwa kattæ won da tip wa da kyrriah deiwa e daw wym biang i thaw wei neiliang ka dorbar chnong leh ym tip ko iyi iyi yeini wym biang i thaw.
Da ong u wa lada ka yung krehkaam u DM&HO lane ka Health Department pyntip ki yeini, da em boon ki bru samen kiwa smat wow e sñiawbha yei thaw cha ka sorkar yow chna ya kani ka Health Sub-Centre.
Neidaw wym hun yeini i pynche na yung krehkaam u DM&HO, ka Dorbar Chnong Hingaria da rai ko wow lai chakhmat yow chim da kiwi won ki luti lada toh hadooh wow yachem wa u Health Minister ka jylla wot hadooh ka luti yong ka aiñ leh khnang wa i hok kiwa chong chnong wa da mang da ka sorkar ymtoh u dooh ki.
Ka kyrwoh na u Waheh Chnong, u Ting Khonglah.
Discussion about this post