I kynaad hapyrdi ka Afghanistan wa Pakistan da joor bha i kat dang mih ki sngi heiwa ha kani ka kyntu ki ar liang da yasiat wei dat Bomb ki mar chiliang u pood ki ar ri wa tip kam u Durand Line.
Ka Ministry of National Defence ka Afghanistan da ong ko wa da tynyap ko ya ki 55 ngut ki chipai Pakistan kam ka tput yeiwa dat Bomb ka Pakistan cha chiliang u pood. Ka sorkar Afghanistan da ong ko wa ynnin i miet ka 26 tarik, heipor kamwa 8:00 waje da siat ko cha chiliang u pood hadien wa kyntoor ki chipai Pakistan ya u pood yong ka ha ki sngi wa dadep.
U heh ka Afghanistan da ong u wa ka Pakistan da kyntoor pood ko wei da tynyap ko ya ki kynthai wa ki khynnah ha Afghanistan yeiwa da su kylliang ko deiwa siat cha liang Paktika, Paktia, Khost, Nangarhar, Kunar wa Nuristan wa em ha Pakistan.
Ka Afghanistan da ong ko wa da tympra ya ki ktem ki chipai Pakistan wei da khyrrup leh ya 19 tylli ki Post chipai hapoh soo kynta. Da yap leh 8 ngut ki chipai Afghanistan wa 11 ngut wa mynsoo.
Neiliang ka Pakistan da ong ko wa da sdang ko ya ka Operation ‘Ghazab Lil Haq’ wow dat ya ki thaw wa em ki Taliban.
U Spokesperson u Prime Minister ka Pakistan, u Mosharraf Zaidi da kam u wa 133 ngut ki Taliban wa da yap wei palat 200 ngut wa mynsoo. Da kam u leh wa ka Pakistan da tympra ko ya ki 27 tylli ki Post chipai ka Taliban wei da khyrrup ya kiwa em ha Chitral, Khyber, Mohmand, Kurram wa Bajaur.
U Spokesperson ka Taliban, u Zabihullah Mujahid da ong u wa ka Pakistan da dat Bomb (Airstrike) ko ha Kabul, Kandahar wa Paktia.
U Defence Minister ka Pakistan, u Khawaja Asif da pynbna u da ka “Open War” pyrchah ya ka sorkar Taliban.
Ka Durand Line, toh kawa 2,611-kilometre wa man u pood wa booh da ka sorkar Britain ha ki snem 1900 hapyrdi ki ar ri yeiwa da kajia ya u pood da ki phaw snem kattu.
Discussion about this post