Ha ka 27 tarik uni u bnai ki chipai wa haap hapoh ka satri yong ka Meghalaya Ex-Servicemen League da hiar ki cha ka chnong Mukhaialong, East Jaiñtia Hills District wow leh burom ya u chipai ka Indian Army uwa da khlaad noh, u Stephan Sana ha chirup deilang kiwa ha-yung ha-sem yong oo, kiwa yahkhmat chnong wa kiwa chah khut sñiawbha. Heiwa neiliang ka yung ka sem da chna ko leh ya u motdur sahnaam u Stephan Sana pyn ha pchem yung.
U Stephan Sana toh u khon ka Jol Sana uwa da kha ha u snem 1997, wei da psiah u cha ka kaam chipai Indian Army ha ka 23 tarik u December 2017 wei da khlaad noh u haka 11 tarik u December 2022, katwa dang em u hei kaamram kam u chipai ha Eastern Ladakh, wei i daw wa khlaad u toh wa duna la’ær Oxygen kawa man leh ka thaw wa joor bha u thah.
Heipor wa khlaad em u hapoh ka 3 Cavalry Armoured Corps.
Ha kani ka sngi kynmoo warom da wai chwa ya u mot sahnaam u Stephan Sana da u Sebastian Marbaniang, General Secretary Officer ka Zila Sainik Board Shillong, bood sa i booh syntu wa da chimbynta da ki chipai, kiwa yahkhmat chnong Mukhaialong wa kiwa ha-yung ha-sem u Stephan Sana.
Neitæ ka Unit yong ka 3 Cavalry Armoured Corps lyngba u Subedar Ganjendra Singh da e kti u haka bei u Stephan Sana yaka Balidaan Patra kawa man ka chithi wa thoh da u Chief of Army Staff ka Indian Army wow e burom hajrong i e kti u Stephan yei mynsien neibynta ka ri.
Neitæ ka Meghalaya Ex-Servicemen League Central Body waka Jaiñtia Unit leh da e kti ki yaka Donation haka bei u Stephan Sana.
U Sebastian Marbaniang hawa klam da yaroh u yaka yung wa da chim ko u chna kat uni u mot sahnaam ya u khon wa yap neibynta ka ri, deiwa yooluti leh wow man u mot wow e mynsien ya ki khon ka jaitbru khamtam yaki khon ka chnong Mukhaialong u mih ki chakhmat wow e kti neibynta ka ri.
U Buam Myrchiang, General Secretary ka Meghalaya Ex-Servicemen League hawa klam ong u kani man ko leh ka sngi wow e mynsien yaki khon khynroo khyllood kamjooh ki bei ki pa yow pynchlur yaki khon u psiah ha ki kaam chipai yow chakri yaka ri neibhah ka kaam chipai toh ka kaam wa em burom tam.
Ong u hao sñiawthooh hi wa ka kaam chipai toh kawa eh neibhah haki ym ye u lai lait naki thaw thah, ki thaw chyiap, ki riat ki ram, ki khloo ki kjam, hap wow lai kat chawa phah ka sorkar, wei hap man kiwa pynkreh neibhah kiwa choon ye ki u wan ha iwon iwon i por.
Tangwa deiwa em ki chipai man i chngaaiñ yaka ri heiwa ki paidbah yoh ki i chongsuk chongsaaiñ.
Khana u wa ka thaw wa khlaad u Stephan Sana toh ka thaw wa khor bha yaki chipai u im, heiwa hap u lai Patrolling da ki 3-4 bnai dei kjat wei ha kini ki thaw ym yoh yei baam wa biang, najrong wym biang i thiah i dem wei da hap pait siar bait yei rukom lai.
Ong u ha kani ka thaw chisien wa da lai teiñkhat ye u lait, heiwa na ka chi kynhun ki chipai lada toh 40 ngut, uwi ar ymdam de u maad yei sñiawsih lada i khlaad næ i mynsoo, wei i kjut leh ye i u wan har rukom lyngba u thah.
Hawa khana yeini ong u ym mut wow pyntieñ tangwa yow pynchlur, neibhah i im yong uwi pa uwi u bru chong haka nasib wa da booh da u Blai, manda mon hi u Blai wow chim lada ym man chipai leh hap hi wow yap haka thaw wa i por wa da bynta.
Neiliang u waheh chnong ka Mukhaialong, u H.Phawa hawa klam sñiawngooh u ya kini ki chipai wa em ha kani ka sngi wa chim haroh ki ka laad u pynsñiawthooh pynchlur ya ki khon ka chnong u psiah haka kaam chipai, pyntip u leh wa ka chnong Mukhaialong ha deilang i pynchlur ki bei ki pa kamwa man katni ym em de randien ki wow psiah la hei kaam chipai, BSF, MLP heiwa da palat 40 ngut ki khon ka chnong wa psiah kreh ha kini ki chnat.
Kiwi won wa e i klam kynthup ki ya u Monlang Ladong, President Jaiñtia Unit, Meghalaya Ex-Servicemen League, u J. Sana uwa da khana yaka parom tbian u Stephan Sana haka yalang wa pynlai da u T. Sana.
Discussion about this post