Ka National People’s Party, West Jaiñtia Hills Unit ynne ka sngi da kynmoo warom ko yaka lyngkhooh sngi yap wa chiphaw uwa seiñ yong ka, u Purno A Sangma uwa jooh ksoh leh kam u Speaker yong ka Lok Sabha haka yalang wa da pynman ha Chutwakhu Indoor Sport Hall Jowai.
Ha kani ka yalang kynmoo warom najrong i emlang ki paidbah wa kyrchaan ka Party NPP na ki Unit waphær waphær ka West Jaiñtia, u Dy. CM ka sorkar uwa man leh u MLA ka Nartiang, u Sniawbhalang Dhar da man u kam u kongsan deiwa emlang u Montri ka chnat i chait i khiah wa Sports & Youth Affairs uwa man leh u MLA ka Jowai, u Wailadmiki Shylla kam u symbood kongsan.
Da emlang leh ha kani ka sngi ka Santa Mary Shylla, MLA ka Sutnga Saipung, ki MDC NPP ka JHADC wa kynthup nadooh u CEM, u Thombor Shiwat, u Chairman, u Dr. Sankey Shangpung wa kiwi won ki MDC.
U Wailadmiki Shylla hawa klam da pynkynmoo u yei lai luti yong oo waka Party NPP khamtam ha u snem 2018 wa sdang yakhun Election MLA u, heiwa boon kiwa ong wym pu ye ki u pdiang ya kani ka Party, tangwa sñiawkmen won u wa nei lai luti wa khian da boon kiwa wan emlang waka Party NPP.
Wei ini i sdang soohthied ka NPP ong u man ko thij kam i lai luti uwa seiñ yong ka hi u Purno Sangma, wa heiwa sdang da embynta chwa u wa kiwi ki Party. Tangwa hadien wa sñiawthooh u wa kam uwa yahkhmat Tribal uwa yakhun neibynta i hok ki Tribal wei da wan leh ka sur neibynta ka thaaiñ Northeast, kamtæ yoo emkaam u wow em da ka Party kawa na kani hi ka thaaiñ ka wow pynyatylli wei ha Delhi leh yow ap ki yei eh ka thaaiñ, kamtæ da seiñ noh u ya ka National People’s Party ha u snem 2014.
Ong haroh u wa u symbe wa da bet u Purno Sangma, kattæ da poor u ha kylleiñ ki jylla ka thaaiñ Northeast najrong wa da em leh yaka State Unit hapoh Rajasthan, Kerela, kamtæ ngait skem u wa u Purno Sangma leh kmen u wow yoo yei nang ku ka Party wa seiñ u.
Wei hawa ong wa kani ka Party ym em pynyaphær ko haka ñiam næ pynyaphær jaitbru, da pynkynmoo wei pynche haroh u hajrong i chimbynta yong oo deilang u Dy. CM wow klam pynbait yei klam uwi naki para MLA hapoh Assembly uwa da klam hajrong ka Reservation Policy deiwa pynmih du yaka kyntien Khasi khlem pynmih Jaiñtia wot hawa da thohlang Khasi wa Jaiñtia haka Reservation.
Ong u wa i yieñ klam yong oo ym mut wow pynyaphær jaitbru tangwa du wow pynbait wei pynche yei klam bakla u para MLA, heiwa kam ki MLA Jaiñtia sñiawkhia ki yeini neibhah wa kiyi kiyi wa klam hapoh Assembly toh kawa neh Record.
Ong u ymphær lada em i pynyoo ñia kiwa boon ha kawon kawon ka rukom leh, tangwa iwa sñiawsih u toh i mih hi da ki bru Jaiñtia wow kynthoh wei khamtam iwa maa chooh chooh wa da ki MDC ka JHADC hi kiwa da jied ki paidbah yow pait yaka riti dustur ka khyndaw u chyiap hapoh Jaiñtia Hills Autonomous District Council, pna da ki hi wa mih u kylli wa i thoh ki jaitbru yi?
Katæ toh kawa maa wei pynsñiawsih ya oo kam uwa yahkhmat, deiwa ong wa lada kwah u yatai, ka District Council em ko neibynta yong ki wow pynsakhiat.
U Sniawbhalang Dhar hawa klam kyntu u yaki para wa kyrchan wow bood yaka nongmuma u Purno A Sangma neibhah i kynmoo burom ya oo khlem da bood kattu katni i sikai wa da booh u, ka Party ym im ko.
“Lada yaklam hapoh jylla Meghalaya i ki Jaiñtia yoh yaroh i haka Politics neibhah ki Khasi jooh yaklam ki wa ki Jaiñtia toh kiwa stat bha u jied ya kiwa mihkhmat ym jooh jied ki daka Party wym poi hei bor synchaar neibhah ha kawon kawon ka sorkar da em bait ki MLA Jaiñtia, wei ini pynyoo ko yei man yatoh bor hapyrdi kiwa yahkhmat wa ki paidbah,”ong u Sñiawbhalang Dhar.
Ong haroh u, “Kini waroh jia ki toh wa ki bru Jaiñtia dang burom ki yaki ma ki woh, burom ki ya kiwa yahkhmat Politics, kiwa yahkhmat ñiam, kiwa yahkhmat haka imlang sahlang wa kiwa yahkhmat haki liang waphær waphær”.
Hawa pynrap yei pynche u Wailadmiki Shylla hajrong ka Reservation Policy ong u, lada ka riti dustur yong i ym im ko, ka jaitbru leh daw yap ko.
“Hao hajrong itu i klam O hapoh Assembly em ki paralok Khasi yong nga wa kylli weileh me pynheh mi yaka Issue wa khian, nga jubab O ya ki boi ye u man kawa khian ha phi tangwa man kawa heh ha nga,” khana u Sniawbhalang.
Ong u kamwa da hap booh Record bait yei yi wa da klam hapoh Assembly, kwah u wa lada toh iwa khian næ heh leh ymtoh u wiar i nei yoh tipmit, wei kiyi kiyi waroh u man kaam ki deiwa yatylli.
Hawa pynrap hajrong i man wa yahkhmat paidbah, ong u heipor Election jooh yañia ya pakhot ktieh, tangwa hadien ka Election toh u yakrehlang neibynta u im ka jaitbru ka jylla, neibhah ka thong hi du kawi, itæ toh neibynta ki paidbah ymtoh da ki paidbah neibynta yong i.
“I ki MLA Jaiñtia lada em i ha kawon kawon ka Party leh ym jooh yachruit i neibhah wa sñiawthooh i wa i toh neibynta ki paidbah. Ki sorkar lai lai wan wan ki tangwa i chakri ya ki paidbah toh u man kamjooh, i chaniah i ha ki paidbah wei u tei leh neibynta ki paidbah,” pynrap chooh chooh u Sniawbhalang Dhar.
Discussion about this post