Ki khynroo khyllood Garo na kylleiñ ka nongbah Shillong, ynne da mih paidbah ki cha ka Rally ka Confederation of Meghalaya Social Organisations (CoMSO) ha Motphran hajrong i lehbor ki baar jylla ha ki thaaiñ thor ka West Garo Hills District wa em hapyrdi i awri katni.
Ini i kynaad da mih i hadien i khang ki seiñbhalang ya ki baar jylla wow thap pyrtuid kam ki kyrtong MDC cha ka Election ka GHADC kawa toh u man ha ka 10 tarik u April tangwa kawa da pynsangeh chwa kattæ.
Ki khynroo khyllood Garo wa kynthup ya ki heh ka Garo Students Union (GSU) Khasi Hills Zone, da mih ryntih ki wow chimbynta ha kani ka Rally kawa man ka dak wow em ryngkat wa ki paaid Garo kiwa em ha Ri-loom Garo, kiwa dang yakhih hadooh ynne pyrchah ya i chimbynta ki wym em ST Certificate ha ka Election MDC ka GHADC.
Katkam i klam ki heh ka CoMSO, i wan psiah pyrchah aiñ ki poi wiar booh i hei maa ya ki paaid Ri-loom, i hok hajrong i khyndaw, i yada katkam wa da mang ha ka riti synchaar ka ri.
Hawa pynman ya kani ka Rally waroh ki dukan yong ki baar jylla ha ka thaaiñ Police Bazaar, GS Road wa Motphran da khang lut ki.
Ki pulit ka East Khasi Hills leh da pynkhlan ki yei bor sonteri ha ka thaaiñ.
Discussion about this post