Ka Ialong Mulang Pohshnong Govt. LP School kawa da sdang nadooh u snem 1975, ha ka 12 tarik uni u bnai da lehkmen ko yei dap 50 snem i lai luti yong ka u e i chakri cha ki khynnah skur lyngba i stat i tip hei ya embyntalang nadooh kiwa yahkhmat ka Dorbar Chnong Ialong pyllun, kiwa yahkhmat ka Dong Ialong Mulang, ki dkhot SMC, kiwa sikai, ki khynnah skur najrong kiwa chah khut sñiawbha heiwa u Montri sorkar, u Wailadmiki Shylla da man u kam u kongsan, ka Dr.Wa-i-sa Sumer, District School Education Officer WJH kam ka symbood kongsan.
Ya kani ka skur da sdang nyngkong na i yung Club ka Dong Ialong Mulang, neitæ dei stat i chemphang kiwa yahkhmat ka Dorbar Chnong Ialong Pyllun kamjooh ka Dong Mulang da ye u pynyieñ ya ka yung Building skur Building yong ka hi, neitæ da pynheh kajiak chisien deiwa yoh yarap naka Scheme MDC lyngba u Shemhok Garod Rs. 5 lak, naka Central Scheme PMAAGY Rs. 20 lak wa naka Scheme MLA Rs. 37 lak lyngba u Wailadmiki Shylla.
Ya ka skur Building thymme wa Rs. 37 lak lyngba u Wailadmiki Shylla da wai paidbah leh ya ka da oo hi hynne ka sngi.
Hajrong i lai luti kani ka skur hei wow e i stat i tip, kamjooh leh wow wanrah yei tei i chna, da pynsñiaw da ka Headmistress, ka D. Paswet kamjooh leh ki waheh wasian ka chnong kiwa ya pait ya pynlailang wa ki khynnah skur wa jooh puræ ha kani ka skur deilang u Waheh Chnong ka Ialong, u T. Ram Phawa, u P. Shylla Ex Chairman dong Mulang, u P.Pale wa kiwi.
Ka symbood kongsan, ka Dr.Wa-i-sa Sumer hawa klam yaroh ko ya kani ka skur wa hanla man ka skur sorkar wei boon ki skur wa em ha kani ka chnong leh, da em palat 100 ngut ki khynnah wa puræ ha kani ka skur, wei ngait skem ko wa ini jia i lyngba i yakrehlang ki bei ki pa wa kiwa sikai kamjooh ki khynnah skur.
Pynkynmoo ko leh cha kiwa sikai yei kyntien ‘Teacher’ deiwa ong wa man i kyntien wa khia bha neibhah ha ki em i chaniah ki khynnah skur wa ki bei ki pa, kamtæ hap ki u maad boon i eh, wei toh u kreh ki yei kaam dei mynsien kitkhlieh kammon u pynwandur yei im ki khynnah ym u pyndep kaamram donhi, kiwa sikai toh u man kiwa chait wa khiah heiwa najrong i e sikai u pynyoo leh cha ki khynnah yei kordor i chait i khiah, i khooid i pliah, kiwa sikai toh u em i sñiawthooh ki ya ki khynnah, wei man leh kiwa yaichah.
Heijooh i por kyntu ko leh ya ki khynnah skur u man kiwa minot hei lai skur wei khreh kot khnang yow tyrchaaiñ ki haka mynried ka mankawi.
Neiliang u kongsan, u Wailadmiki Shylla won kwah u wa manda poi 100 snem kani ka skur, ka Building leh u nangheh nangkrai chooh chooh ko, wei kiwa sikai leh u nangboon ki kamjooh ki khynnah skur wa puræ ha ka.
Yooluti u wa i roi i paar u nangmiat nangbha chooh chooh ki ha ki liang waroh deiwa em i yatylli yakrehlang.
Kyntu u wow pynneh yei khooid i pliah dei wow kheiñkor kam ka thaw kyntang ym u leh pynsih næ kheiñ wa toh ka skur sorkar, tangwa toh u kynmoo iwon iwon wa wanrah ka sorkar toh i yong i hi yow myntoilang.
Ong u wa oo ym em man u du kam u MLA donhi tangwa hawa wan u ha kani ka chnong man u leh kam u pa neibhah hawa e u iwon iwon, pait haroh u wa da dap da biang næ ym pu em neibhah ym em yang u du kat iwa paan donhi ki waheh ka chnong tangwa pna pait haroh u iyi wa emkaam ware ki paidbah.
Na itæ i daw yow pynsuk yaki paidbah ka chnong pyntip u wa da pynyoh ya ka Sanction Order wa Rs. 55 lak yow chna Sub-Centre thymme ha kani ka chnong ka wow man kyrpang du kat yaka Ialong donhi.
“Kam u MLA, haki 7-8 snem da pyrchang oo u lehbha u wanrah boon i roi i par hapoh ka Constituency wa kynthup ki Scheme samen, tangwa kattæ leh dang em ki wym pu jooh pu jaam lut waroh neibhah ym ye u leh syndon, kamtæ emkaam ya ki paidbah u man kiwa yaichah neibhah daw wanrah chooh chooh u ya i roi i paar”, da ong u Wailadmiki Shylla.
Deiwa pynrap leh wa da u MLA uwa da yoh u kreh hadooh 15-20 snem leh ymtoh iwa suk ya oo wow ye u wanrah ki kaam pynroi kamwa da wanrah u hapoh kini ki 7-8 snem.
Ha kani ka sngi u Wailadmiki da kular u leh wow pyrchang u pyntoh pyntne yei dawa kani ka skur nadooh wow siang yei madan wa kiwi wa kani ka skur da kyrpaad ko ya oo ha kani ka sngi.
Da pynchong chit ya kani ka sngi da i chaad i rwai wa kiwi de.
Discussion about this post