Hadien wa pynmih ka Ministry of Home Affairs ka sorkar India ya ka Circular wa ong wa hawa rwai ya ka National Song ka ri i Vande Mataram, da hap wow rwai waroh 6 tylli ki Stanza, da mih i pyrchah na kiwa boon neidaw wa em i pyrtuid ki Blai Hindu wei neidaw wa hap wow rwai yeini ha waroh ki skur wa kiwi de ki yalang (Official Events).
Heiyatoh wa ini, da em uwa lai yaleh mukotduma ha ka Supreme Court ka ri yow pyrchah yeini wa da pynbna ka MHA tangwa ka miej bichaar u Chief Justice of India, u Surya Kant, u Justice Joymalya Bagchi wa u Justice Vipul Pancholi da ong ki wa ha ka Circular ym em pynbor tangwa man ko kam kawa tyrwa donhi wow leh yeini.
Ya kani ka mukotduma da yaleh da u Muhammed Sayeed Noori uwa ma u tre ka Raza Academy heiwa neiliang u muktiar yong oo da ong u wa ini daw wanrah ko chei chah pait-khmat wei chah lehbeiñ ya kitu ki wym bien u rwai ya ka National Song.
Ka yung bichaar da kyntait ko ya kani ka mukotduma deiwa ong wa kani ka Circular toh kam ka sneiñ donhi (Advisory) wei ym em kyndon wow pynchitom lada ym bood yeiwa phah. Tangwa u muktiar da ong u wa lada ym ye u pynchitom leh, kitu won ki wym bood ye ki wow chah mang ha kitu kiwa em yei thmu wa sih.
Ka Supreme Court da kdaw ko leh wa ha kani ka Circular da pynemkaam dei ktien “May” ymtoh “Shall” iwa mut ymtoh wa pynbor wow leh yeini hadooh wow rwai ya ka National Song hapoh ka Academy uwa yaleh mukotduma.
Chooh chooh da ong wa lada chah lehbeiñ neidaw wym rwai ya ka National Song ye ki wow wan pyntip cha ka Supreme Court.
Discussion about this post