Hadien wa yoh ya ka dorkhat na ka School Management Committee (SMC), Jalaphet Bri Sutnga, Government Lower Primary (LP) School wow paan kamra Class, ynne ka sngi u Education Minister, u Lahkmen Rymbui chirup wa ka MLA ka Sutnga-Saipung, ka Santa Mary Shylla da lai pait ki ya ka skur heiwa da yaklam ki wa ki khynnah kamjooh wa kiwa sikai.
U Lahkmen hawa e i klam da ekhublei u ya kiwa embynta ha ka skur kamjooh ka MLA, kiwa sikai, ki dkhot ka SMC wa da kyrchaan ki ya i puræ puthi heiwa ka enrolment ha kani ka skur man ko kawa heh dooh na ki Lower Primary School ha ka jylla.
Da khana u leh wa duna ki kamra Class ha ka skur kawa em 330 ngut ki khynnah iwa pynyoo yei chaniah ki paidbah ka thaaiñ ya ka skur kamjooh kiwa sikai. Da ong u wa ka sorkar kreh ko wow pynboon ya ki kamra class khnang wow pynsuk ya kiwa sikai.
Ha kani ka sngi u Lahkmen da pynbna u Rs. 40 lak neibynta wow chna ya ki kamra Class ha ka skur kamwa da kdaw da ka SMC wa ki sahep ka chnat puræ puthi. Da pynbna u leh Rs. 11 lak ya ka Jalaphet Upper Primary School wow chna ya ka Store-cum-kitchen Room.
Heiyatoh wa kiwa sikai, da phah u ya u Sub-Divisional School Education Officer (SDSEO), East Jaiñtia Hills pynsmat u thung sa ar ngut kiwa sikai ha ka skur khnang wow rap stiñ ka lyngkor yong kiwa em katni.
Ka Santa Mary Shylla hawa e i klam da ekhublei ko ya kiwa sikai ka skur kiwa da kreh chitom kat hadooh wa yoh ki yei chaniah na ki paidbah wow phah ya ki khon cha kani ka skur.
Da pynbna ko leh Rs. 20 lak cha ka skur lyngba ka District Mineral Foundation Scheme (DMF) wow chna chooh ya ki kamra class.
Discussion about this post