Tyrrah ka lieñsuiñ ka SpiceJet wa ka Akasa Air | Chah pyndam ki Pilot  

Ar tylli ki lieñsuiñ wa em ha khyndaw ha IGI Airport, New Delhi da ya tyrrah ki ha ka 16 tarik uni u bnai wei kini ki lieñsuiñ toh kawi ka yong ka SpiceJet (B737-700 Aircraft) (SG-124, kawa lai Leh–Delhi) wa kawi won toh ka yong ka Akasa Air (B737 MAX 8 Aircraft) (QP-1406, kawa lai Delhi–Hyderabad).

Ini i thaw wa jia toh hajan ka thaw booh lieñsuiñ namo ka Bay No. 106 wa em ha Terminal 1.

Ka lieñsuiñ ka Akasa heini i por wa jia toh kawa dang chah ngiat yow mih ko napoh ka Bay No. 104 yow sdang ko ya ka Engine wei ka lieñsuiñ ka SpiceJet kawa em hajan ka Bay No. 108 toh kawa da e bor da ka ATC yow lai cha ka Bay No. 106 hadien wa u Pilot da pyntikna u wym em de yajan wa ka lieñsuiñ ka Akasa.

Heini i por ka lieñsuiñ ka Spicejet da dong ko khlem da yoh bor na kiwa em ha khyndaw wa da hoi u dong khlem da tyngkhooh. Kamtæ ka Right Winglet ka SpiceJet da tyrrah ko ya ka liang tidiang (Left Horizontal Stabilizer) ka lieñsuiñ ka Akasa heiwa waroh ar tylli ki lieñsuiñ da chah ktah ki wei da khang noh ya ki wow hær ki.

Related posts

Lai yachem ka JSU wa ka Chief Postmaster ka Jowai Post Office neidaw wa khlem akor kiwa kreh

April 17, 2026

Pynche ka seiñ ki Cement Plant yei pynemkaam da ki Bulker Truck

April 17, 2026

Neiliang ka DGCA da sdang ko ya ka takit nadooh ki bru wa toh u pait yeini kiwa em ha khyndaw wei da pyndam Duty leh ya kini ki ar ngut ki Pilot wow pynhær ki ya ki lieñsuiñ.

Ka Ministry of Civil Aviation da ong ko wa da paitbniah bha ko yeini wei da leh ko yeiwa emkaam yow lait u jia biang kamni.