U Symbood Montri Rangbah ka jylla, u Prestone Tynsong hawa wan emlang wow wai ya ki 6 tylli ki mooyurim yong ki kreh wa dadep pynkreh wa kiwa daw pynkreh hapoh ka Nartiang wa Jowai Constituency ynne ka sngi ha ka yalang wa da pynman ha Wahiajer, West Jaiñtia Hills District, ong u wa ha ki 8 snem tam i chakri ka sorkar MDA da yoo yei kylla wei sñiawkmen u leh hajrong i ye u pyndep ya ar tylli ki Five Star Hotel wa heh ha Shillong wei ha kini ki Hotel da em boon ki khon khynroo khyllood ka jylla wada pyndep yei chah pynpliah ha ki kaam Hospitality, Hotel wei da uiñ ki na ki ri ki jylla waphær yow kreh ha kini ki Hotel.
Ong u ka sorkar dang em chooh chooh ko i thmu u seiñ ya kam kini ki Hotel ha kiwa boon tylli ki thaw, heiwa boon tylli ki soskular MoU wa ka sorkar dadep soi ko deiwa yooluti sa kajiak snem neini daw yoh sa 3-4 tylli ki Five Star Hotel ha Shillong wa kamjooh cha kiwa rap jngai na Shillong.
Yooluti u wa lada yoh u sdang wei pyndep ya kam kini ki kreh, da ki hajar ngut ki khon khynroo khyllood ka jylla kiwa kreh ha kylleiñ soodong ka ri India u wan kreh ki ha ka jylla yong i hi.
“Emkaam u man kiwa syndong, emkaam leh yei pyrchah, tang hawa pyrchah wan yaklam hajrong meij yow ya pynbait lada em i bakla, neibhah waroh ym em wa biang lut,” da ong u Prestone Tynsong.
“Em wa ong ka sorkar MDA-I, MDA-II tlot ware ko u krehkaam ya ka Law & Order, heiwa em leh kiwa ong ileh ym leh phi kamni kamtai, tang u khana O ya phi u Montri Rangbah, nga wa u Sniawbhalang ong i ahoh, i toh u man i kiwa jai jai, i toh kiwa yahkhmat paidbah weiwa kwah i leh ya ki paidbah u sñiawthooh che ki yei yi wa leh i,” da pynrap u Prestone.
Da pynkynmoo haroh u hajrong i pteiñ yakhih ki khynroo ka Green Tech Foundation heiyatoh wa ka Lumpongdeng deiwa ong u, ym ye i u khang næ pynbor, tangwa neiliang ka sorkar em ko u ong wa ka dwar wai ko neibynta u yaklam.
Ong u wa kattæ da mih sa kiwi kiwi ki pynbaad wa boon jait wa ong wa yoosar ka sorkar mut ko u dai ya ki thaw ki bhaw, heiwa da pynche u wa ka Project wa jia katni toh haka thaw sorkar, tangwa kattæ leh lada em iwon iwon i wit i thut man ki kiwa smat u pynche, neibhah ka MoU leh ymtoh kawa yasoi deiwa rieh, heiwa yoh u yoo lut ha ka Website deiwa bood leh thij pa thij ya ki kyndon.
Heijooh i por khut kyntu u ya waroh kiwa chong chnong ka jylla u ya krehlang ki khnang wa neini chakhmat ka jylla Meghalaya u man ko kawi naka thaw wa kiwa uiñke suwari na kylleiñ ka ri u maya ki wow wan pynlut ki yei por chuti yong ki.
“Da yoo phi ya i roi i paar wa da wanrah i, dang kwah chooh i u nangpynkhlan, tangwa lada em kiwa pynsñiawthooh bakla, i kaam wa toh u dep chisnem arsnem leh daw baam por ko”.
Pynsñiaw haroh u i yoosuk yei rukom man ki bru Jaiñtia wym jooh rap boh kjat ki yow tympat yow bru, na itæ i daw tooid i roi i paar cha Jaiñtia.
Wei ki paidbah leh sñiawthooh ki yei kordor i roi i paar wa ka sorkar thmu ko.
Discussion about this post