U Symbood Montri Rangbah ka jylla, u Sniawbhalang Dhar ynne ka sngi hawa wai ya 6 tylli ki mooyurim yong ki kreh waphær waphær wa dadep pynkreh wa kiwa daw pynkreh hapoh ka Nartiang wa Jowai constituency, haka yalang wa pynman ha Wahiajer, West Jaiñtia Hills District, chirup i emlang u Prestone Tynsong, Symbood Montri Rangbah deilang u Montri ka chnat Sports & Youth Affairs, u Wailadmiki Shylla wa ki MLA na ki Constituency waphær waphær ka jylla, ki MDC ka JHADC, ki sahep sorkar na ki chnat krehkaam waphær deilang ki paidbah, da ong u wa i wan heini ym mut wa em i roi i paar du ha Nartiang Constituency, tangwa ha kiwi kiwon ki Constituency leh u yohlang ki kamjooh wot ha ki Constituency yong ki MLA ka Liang Pyrchah.
“Ha i synchaar paidbah em kiwa yakhih chah thngan wa kwah yei roi i paar, em won kiwa chah thngan yow beh yei roi i paar,” da ong u Sniawbhalang Dhar.
Ong u ym em iwon iwon i ñiaw chiliang ya kawon kawon ka chnat krehkaam, heiwa ka sorkar wot hapyrdi boon i chah pynbaad leh, kreh ko yei kaam neibynta ki paidbah wei kamwa man kattæ da ye u wanrah ki kaam pynroi wym jooh poi pyrkhat u yoh ha ka jylla, la heiyatoh ki sarok, ki kaam uiñke suwari, ki umbaam umdih wa kiwi.
Heiyatoh wa i pynbaad kiwa boon deiwa kdaw samen ya oo wa u Prestone, ong u kam kiwa mihkhmat hap ki wow em ha kawon kawon ka bynta wa ki paidbah, teiñ teiñ u ya chaad ya kmenlang wa ki, u ya lailang cha i yaseiñ, najrong wa pyndep yei kreh wa yei kaam, tangwa hajrong ini em won kiwa chim kabu u pynsniawthooh bakla.
Kamtæ khut u i yakrehlang neibynta ki kaam wa bha wei ymtoh leh u pait du yei bakla, tangwa u pait leh ya ki kaam wa bha ka sorkar.
Ki Scheme pynroi wa dadep pynkreh hapoh Nartiang Constituency wei kiwa da wai ha kani ka sngi kynthup i chna pynbha pynmiat ya u surok U.N. Road Pdeiñ Mukhim, Sohphoh Mookabeng & Kdohkule uwa em kamwa 21.255 Km wa da mang Rs. 100 klur, ka Wahiajer Supply Scheme, i pynku yei kaam uiñke suwari ha chnong Wahiajer ha ka mang poisa wa Rs. 2 klur wa i chna ya artylli ki thaw pynyeiñ kari neibynta ka National Games hajan ka Multi Sports Complex Wahiajer.
Katwa ki ar tylli won ki kreh wa daw pynkreh ha Nartiang wa Jowai Constituency kynthup i pynkreh sarok haka mang poisa wa Rs. 20 klur tam, wa i mang u chna ya ki Floodlight ha Multi Sports Complex Wahiajer haka mang poisa wa Rs. 8 klur tam.
Discussion about this post