Ka Joint Action Committee (JAC) kawa kynthup ya ka East Jaintia Hills Truck Owner and Transporter Association waka Jaintia Hills Truck Owners’ Association, da pteiñ wei nang pynjoor chooh chooh ko yei yakhih wa khlem booh por yong ka deiwa ksoh wei pyndong ya ki Bulker Truck yong waroh ki karkhana Cement, ka East Jaiñtia Hills wei kamjooh leh ya kiwi tawon ki Truck kiwa mih wa lai cha ka Star Cement wa ka Dalmia Cement.
Kam wow pynkynmoo wa ka JAC da sdang ko yeini i yakhih deiwa ksoh wei pyndong ya ki Bulker Truck wa kit Cement nadooh ka 14 tarik uni u bnai ha Tuber Takhniang, East Jaiñtia Hills. Katwa nadooh ka 24 tarik nawon da pynjoor chooh chooh yeini i ya khih deiwa ksoh wei pyndong sa ya kiwi tawon ki Truck kit Cement wei Clinker yong ka Star Cement wa ka Dalmia Cement.
Ki daw wa pynman ya ka JAC wow chim da kani ka luti toh ha ki artylli ki yurim. Kawa nyngkong toh i dawa na kitai ki Cement Company wow pyndooh pyndam noh chisiendon ya kitai ki Bulker Truck neibhah i pynemkaam ya kitai ki jait Truck wow kit wei u lai li booh Cement cha kylleiñ ki thaw yong ka ri Khasi-Jaiñtia wa ka jylla hi waroh kawi, da pynman ko ya ki tre Truck tre ri tre muluk wow dooh khih dooh khan noh ki ha kitai ki Company.
Kawa ar nawon toh i dawa na ka Star Cement wa ka Dalmia Cement wow burom wei u pynkrehkaam hok yeiwa da ya pynbait wa ka JAC, deiwa e Trip mar 9 trip ha ka chi sngi ya kawi kawi ka seiñ, wei kamtea ter ter. Neibhah katkam wa man kattæ, kitai ki Company, e Trip ki du 3 hadooh 6 Trip hi-eh ya kawi kawi ka seiñ, najrong wa pynyang slem ya ki Truck hadooh 4-9 sngi ha i thaw thap (Load) wei i thaw pynhaap mar. Ini i leh buit tooh yong kitai ki Company da khatæ ko yei yoh Trip yong ki Truck, wei wa ha ka chisnem, ka JAC da dooh noh ko kamwa mar chiteiñ na ka bhah yoh Trip yong ka ha kitai ki Company.
“Deini i i leh khliehchrieh yong kitai ki Company Cement, kawi kawi ka Truck jooh yoh Trip ko katkam wa man katni du 2-3 Trip donhi ha ka chi bnai. Kamtæ tang u su ram cha ka Bank wei u su tulop ya kiwa yah kari, u thied khoo, u pynlai skur khon ym dap de,” da ong ka JAC.
“Hei yong sakhiat da wanrah ya kitai ki Company Cement waheh bha cha kani ka ri ka muluk yong i ha ryngkat i kular yow e khih e kreh (Direct wa Indirect Employment) ya i ki tre ri, tangwa ym em u man ko kamtæ, neibhah ym em u ksoh ki yeiwa da kular ki, heiwa ya kiwa boon hi ki khih ki kreh da e du cha ki bru yong ki lane kiwa na baar,” da pynrap ka JAC.
“Katwa kamtæ, hajrong kitai ki mat dawa wa i yakhih, kiwa toh neibynta ka hok yong i ki tre ri tre muluk, lada jia wa kitai ki Company Cement ym mano ki, ka JAC dow pynjoor chooh chooh ko neini chakhmat yei yakhih yong ka, heiwa lada jia iwon iwon iwa sñiawsih, kitai ki Company hap ki wow chim yei kitkhlieh”, maham ka JAC.
“Kani ka yakhih toh neibynta i yap i im yong i kam ki tre ri tre muluk. Katwa kamtæ kyrpaad ya waroh ki dkhot yong ka JAC wow sñiawbha ki u yieñ skem ha ki yurim yong ka JAC, weiwa u ya kitkhialang ya kani. Heijooh i por leh, ka JAC kyrpaad haroh ko ya kiwi tawon ki seiñbhalang khamtam kitu kiwa krehkaam hapoh u pood u ang yong ka Ri-loom Jaiñtia wow sñiawbha ki wow e yei kyrchaan yong ki yeini i yakhih khnang wa i kam ki tre ri tre muluk yow jop i neibynta i hok i yong i yow dam u chah yoobeiñ kitai ki Cement Company,” da pynkut u kyrwoh na ka JAC.
Discussion about this post