Ka Joint Committee wa da chna kyrpang lyngba ka hukum ka NGT wa kynthup nadooh u SC Sadhu, IAS, Secretary ka Forest and Environment Department, u Er. Abhay Kumar, CWES, General Manager ka Brahmaputra Board, u C.E. Wahlang, Superintending Engineer (WR) HPD, Water Resource Department, u Dr. G.H. Chyrmang, MFS, Member Secretary ka Meghalaya Pollution Control Board Meghalaya Shillong wa kiwi de kiwa da lai hiar lai pait ya ka wah Myntdu ha ka 23 tarik u February wa ha ka 21 tarik u April 2026 da phah ki ya ka Report yeiwa chem ki.
Ha ka Report da ong u wa uni u sarok Jowai Bypass Road toh uwa pynyabi ya u NH-40E wa ka NH-44 wei jrong u 5.915 Km uwa nyngkong da yoh Contract da ka M/s Kampong Kamyer Company kawa na Arunachal Pradesh wow kreh ha u March 2022 tangwa da pyndam noh ka (Technical Reasons) wei da e won ya ka Contract cha ka M/s Dhar Construction Company ha ka 16 tarik u January 2023 deiwa e por 18 bnai yow pynchna ya uni u sarok iwa mut hadooh u July 2024 heiwa ya u sarok dadep u chna tangwa da slem neidaw wa slem u pyndep ya ka yingkieñ wa em ha Liar Pamkam kawa da ye u pyndep ha u March 2026.
Ha kani ka Report da ong wa ha ki bynta ka Liar Pamkam da chem wa hawa sliah wei khloh yei khyndaw ym em leh yeiwa emkaam yow khanglaad yei khyndaw wow poi ki cha ka wah hanla em i booh ya ki churia wa thap khyndaw tangwa kini ym man ki kiwa biang.
Ha ki bynta ka Mynkrem leh da chem wa da noh khiar yei ktieh wei khyndaw cha ka um kamjooh leh ha Treiongriang da man i jooh.
Ha ki bynta ka Liar Pamkam da yoo leh wa em ki hali rep kba kiwa chah ktah heiwa ka PWD da phah ko ya u Contractor wow lai pynkhooid yeini.
Kani ka Liar Pamkam leh da man ko kawa da kset sbak da i khyndaw wa kiwi de wa mih nei chna ya u sarok wei da yoo leh ha ka Dam ka PHE wa lang khyndaw ko.
Da ong leh wa neidaw wa taan umkor ka PHE na kani ka wah Myntdu, deiwa lang khyndaw da duna leh i yillu ka um ha ka Dam wei kiwi ki um khian kiwa kai cha ka Myntdu leh toh ki wym em de khooid.
Da kdaw leh wa ka Kampung Kamyer Company kawa da ieh yei kreh wei hadien wa chimkti da ka Dhar Company, da pteiñ yei kreh khlem da bood ya ki kyndon wow yada ya ka rymaw.
Wei heiyatoh wa kitu kiwa chah ktah ki thaw rep, ka Dhar Company da su ko ka bait lutsan cha ki.
Kamtæ kani ka Committee da tyrwa ko wa emkaam wow khloh lut ya waroh i khyndaw wa kiwi de kiwa da noh ha tre ka yingkieñ wa em ha Liar Pamkam wei hadien ini wow tymmoh da ki jaar (Geotextile Nets), u thung deiñ wei wow pynmiat pynskem ya ki chariñ loom. Yei khyndaw wa kiwi kiwa da kit neini wow lai noh ki ha Demthring wa da em i thaw wa da booh wow leh yeini.
Heiyatoh wa ka Mynkrem da ong wa hap wow pynsangeh noh chisiendon yei noh ya waroh ki jait wa mih nei pynchna wei wow khloh wei sai lut ya waroh wa da haap chapoh ka wah wa harood ka wah.
Heiyatoh wa ka Treiongriang da phah wow khloh ya waroh iwa da kai cha ka wah hadooh wa da khian i kmai ko wei heini leh wow booh ki Geotextile Nets, u pynchkeh yei khyndaw wei wow thung deiñ.
Neibynta won ka wah Myntdu waroh kawi, neiliang ka Water Resource Department u pynman ko yei thooh bniah wei wow khana ko kammon wow pynbha pynmiat biang ka.
Discussion about this post