Ka kasari da rai ko wow e ya ka hukum heiyatoh wa ka jamin ki heh ka KSU ha ka 8 tarik uni u bnai wei kini ki heh kynthup ki ya u President, u Raymond Kharjana wa u General Secretary, u Reuben Najiar.
Kini da chah kem ki heiyatoh wa i awri wa mih na ka Rally wa pynman ha ka seiñ ha ka 19 taik u August ha Shillong.
Ka Additional Sessions Judge da pyndep ko yei bichaar ha ka 6 tarik ya i paan jamin kini ki ar ngut wei ya ka hukum næ ka rai daw e ha kani ka 8 tarik.
Kini ki ar ngut da chah pynngat ki ha ka Sadar PS Case No. 307(8)2026, heiyatoh wa ka Rally heiwa da chah tympiah 31 tylli ki kari wei da chah dat 18 ngut ki bru.
U Vice President ka seiñ, u Pynkmenlang Sanmiet da yoh u ya ka jamin wa chipor neibynta ka 20 sngi yow ye u wow pyndep yei chah sumaar yeiwa chitom u.
Da pyntip u wa heipor wa chah kem u, toh heipor wa ong u Doctor wow pyndep yei chah sumaar hapoh 6 tayaaw tangwa ym ye wow pyndep yeini.
Kamtæ heipor wa chong patok da pteiñ u wow mih snaam khmut neidaw wa joor ku ka Blood Pressure wei yoh u leh yei kjut khlieh (Migraine) wei chitom leh u riñ mynsien.
Discussion about this post